Beeld-fotograaf by Unisa aangerand
2011-08-23 14:12
Pretoria – 'n Beeld-fotograaf is Dinsdagoggend deur 'n groep veiligheidswagte by 'n gebou van Unisa aangerand terwyl hy 'n verslaggewer vergesel het wat ondersoek wou instel na klagtes oor die lugreëling en slegte reuk in die gebou.
'n Veiligheidswag wou die onderwysberiggewer, Alet Rademeyer, en fotograaf, Craig Nieuwenhuizen, nie toegang tot die Eskia Mphahlele-gebou gee nie.
Die wag het later na die hoofingang van die gebou gestap en Nieuwenhuizen en Rademeyer het hom gevolg.
Volgens Rademeyer het 'n ander wag op hulle afgestorm en hulle beveel om terug na die hek te gaan. Hy het Nieuwenhuizen teen die skouer gestamp.
'n Woordewisseling het ontstaan en sy en Nieuwenhuizen het terug hek toe begin stap, het Rademeyer gesê.
By die hek het die wag Nieuwenhuizen aan die keel gegryp. Nog twee of drie wagte het begin om die fotograaf te slaan.
Nieuwenhuizen het pepersproei uit sy sak gehaal en sy aanvallers gespuit om die aanval te probeer afweer. Hy het op die grond geval terwyl hulle aangehou het om hom te skop, het Rademeyer gesê.
Volgens haar was daar nie enige reaksie op haar pleidooie om op te hou met die aanranding nie.
Peet Kruger, redakteur van Beeld, het in reaksie op die voorval gesê bullebakkery soos hierdie aanranding van ‘n persfotograaf deur veiligheidswagte by Unisa is totaal onaanvaarbaar en in stryd met die gees van die land se demokrasie.
''Die joernaliste was by 'n gebou van ‘n openbare instansie.
"Joernaliste se rol is om Suid-Afrikaners se stories te vertel sodat gewone mense gehoor word en om die lig te laat skyn op probleme in die hoop dat mense wat die gesag het, die probleme sal regstel. In die geval was dit die storie van Unisa-werknemers se onaangename werktoestande nadat die departement van arbeid die vorige dag opdrag gegee het dat die lugversorging afgeskakel word.
"Aanranding en geweld – teen wie ook al – is nie die manier om vrae, ondersoeke en debat te hanteer nie."
– Volg Nuus24 op Twitter
- Beeld