'Bedrog' met beurtkrag
2011-09-14 09:01
Kaapstad. – Individue in drie elektrisiteit-rolspelers het dalk kragonderbrekings in 2008 vir eie gewin gemanipuleer.
Beeld verneem van ’n betroubare regeringsbron mense in Eskom, die departement van energie en die Nasionale Energiereguleerder van Suid-Afrika (Nersa) is dalk betrokke.
Die bron beweer die individue het baat gevind onder meer deur die verskaffing van bystandkragopwekkers aan hospitale en munisipaliteite deur private maatskappye waarby hulle betrokke was.
Suid-Afrika is tussen Januarie en April 2008 verlam deur aanhoudende kragonderbrekings en bystandkrag was hoog in aanvraag.
Die kragonderbrekings het die ekonomie miljarde rande gekos.
Omphi Aphane, adjunk-direkteur-generaal van energie, se naam is al rakende die kragopwekkers genoem.
Aphane is ’n direkteur van Lesedi Engineering Services, ’n groep wat reeds verskeie kontrakte met Eskom losgeslaan het.
Lesedi Engineering spog op sy webwerf dat hy reeds tenders ontvang het vir verskeie kragprojekte, sowel as die installering van kragopwekkers, onder meer by ’n nuwe hospitaal in Mamelodi.
Die maatskappy het volgens die Cipro-webwerf sowel as sy eie webwerf twee direkteurs, Aphane en mnr. Julian Masego, wat self ook voorheen by Eskom gewerk het.
Masego het Dinsdag geweier om kommentaar te lewer oor Aphane se betrokkenheid by die maatskappy.
Hy wou nie ontken of bevestig dat Aphane steeds ’n direkteur by Lesedi Engineering is nie.
Aphane self het die aantygings verwerp.
“Laat hulle maar aantygings maak. Ek weet nie waar kom die logika vandaan nie.”
Aphane het ontken dat hy ’n direkteur by Lesedi is.
Dipuo Peters, minister van energie, het die spesiale ondersoekeenheid (SOE) gevra om Eskom te ondersoek oor moontlike korrupsie en tendermanipulasie.
Sy het Dinsdag erken dat sy bewus is van die aantygings teen Aphane. Sy het ook gesê dat hy nog nie geskors is nie. “Dit is nie my plek om hom te skors nie. Dit is die direkteur-generaal se plig.”
Peters het gesê sy het vertroue in die SOE se ondersoek.
“Ek het hulle reeds in Junie gevra om te kyk na alle verkrygingsprosedures by Eskom. Wat ook al sou opkom uit die ondersoek sal verder op uitgebrei kan word.”
Marika Muller, woordvoerder van die SOE, het bevestig hulle wag steeds op ’n proklamasie oor die ondersoek, maar doen reeds werk by Eskom.
“Ons fokusgebiede vir Eskom is op kontrakte, verklaring van sakebelange en belangebotsings. Ons doen ook baie werk met hul (Eskom se) interne forensiese kapasiteit (sic).”
Muller sê die SOE gaan nog nie in dié stadium kommentaar lewer nie.
Die direkteur-generaal van energie kon nie vir kommentaar bereik word oor die moontlike skorsing van Aphane nie.
– Volg Nuus24 op Twitter
- Beeld