Bedrog in polisie
2010-09-11 07:00
Johannesburg - Meer as 900 mense in diens van die polisie is aan bedrog skuldig bevind nadat die Spesiale Ondersoekeenheid (SOE) hulle betrap het dat hulle welsynstoelaes van die staat gesteel het.
Dié mense is polisiebeamptes en burgerlikes in diens van die polisie. Die SOE gaan glo nog honderde laat aankla weens soortgelyke bedrog. Nie ’n enkele van dié mense is geskors of afgedank nie. ’n Polisiewoordvoerder sê sowat ’n derde van hulle is dissiplinêr aangekla en het óf skriftelike waarskuwings ontvang, óf hul afdankings is met ses maande opgeskort.
Dié mense in die polisie is onder die sowat 15 000 staatsamptenare wat tot dusver aan bedrog skuldig bevind is in die SOE se ondersoek na staatsamptenare wat onwettig welsynstoelaes ontvang.
Die amptenare het pleit-ooreenkomste met die Nasionale Vervolgingsgesag aangegaan en skuld erken op aanklagte van bedrog. Hulle het opgeskorte vonnisse ontvang en moet die geld wat hulle gesteel het, met rente aan die staat terugbetaal.
Die SOE – ’n onafhanklike agentskap wat korrupsie en wanbestuur in die staatsdiens ondersoek – het reeds 96 000 staatsamptenare geïdentifiseer wat welsynstoelaes van die staat gesteel het. Nog 80 000 amptenare kan van bedrog aangekla word.
Die hoof van die SOE, Willie Hofmeyr, het vandeesweek bevestig dat sy eenheid 945 dissiplinêre sake aan die polisie oorhandig het. Bykans 10 000 ander sake is aan nasionale en provinsiale staatsdepartemente oor die land heen oorhandig.
’n Woordvoerder van die polisie, kol. Vishnu Naidoo, sê die SAPD is net bewus van sowat 350 mense in diens van die polisie wat bedrog gepleeg het. Hul dissiplinêre verhore is afgehandel, hulle is gewaarsku en hulle werk steeds vir die polisie.
’n Senior navorser by die Instituut vir Sekerheidstudie (ISS), dr. Johan Burger, het gesê dit is “ontstellend” as polisiebeamptes wat bedrog gepleeg het, toegelaat word om in die mag te bly. “Dit was nog altyd die norm dat polisiebeamptes wat aan bedrog skuldig bevind is of gesteel het, nie geskik is om in die polisie te dien nie,” sê Burger.
“Dit lyk asof daar intussen ’n verdraagsaamheid vir korrupsie ingesluip het en dit voorspel niks goeds vir die toekoms nie.”
Die veroordeelde amptenare het onder meer kinderonderhoudstoelaes, pleegsorgtoelaes en ouderdomspensioene gekry waarop hulle nie geregtig was nie. Hulle het onder meer valse beëdigde verklarings afgelê en was in besit van valse identiteitsdokumente en geboortesertifikate. Ander het amptenare in die verskillende departemente gebruik of omgekoop om hulle te help om die toelaes te kry.
Hofmeyr sê die ondersoek na onwettige welsynstoelaes is nog net op nasionale en provinsiale regeringsvlak gedoen. Die ondersoek moet nog uitgebrei word tot munisipale amptenare en dán kan die syfer van 96 000 nog aansienlik groei.
Burger sê korrupsie is ’n sweer wat net erger en erger word. “Hoe kan jy sê jy’s ernstig om korrupsie uit te roei, maar jy laat korrupte amptenare toe om hulle werk te behou?”
Vrae aan nasionale departemente of hulle dissiplinêre verhore teen amptenare gehou het wat skuldig bevind is, het geen antwoorde opgelewer behalwe van die polisie nie. Die Vrystaatse onderwysdepartement sê hy het dissiplinêre stappe teen 184 amptenare ingestel. Hulle het almal finale waarskuwings ontvang.
’n Woordvoerder van die Wes-Kaapse gesondheidsdepartement het gesê 188 amptenare is in dissiplinêre verhore skuldig bevind en het waarskuwings ontvang. In dié provinsie se onderwysdepartement is 344 amptenare skuldig bevind.
Onderwysers wat skuldig bevind is, is óf ontslaan, óf gewaarsku en beboet met tussen R2 000 en R8 000.
Hofmeyr sê die SOE is tans besig met “baie sensitiewe” ondersoeke na amptenare wat betrokke is by bedrog rondom ongeskiktheidstoelaes. Baie meer geld is betrokke as by gewone welsynstoelae-bedrog en misdaad-sindikate en korrupte dokters is betrokke.
Die SOE ondersoek ook behuisingsbedrog waarby R2 miljard betrokke is. Meer as R40 miljoen is reeds teruggewin en die polisie het 1 910 amptenare in hegtenis geneem wat by bedrog betrokke was.
- Volksblad