Bedrieërs teiken Suid-Afrikaners in Aus

2013-02-12 07:00

Johannesburg – Die polisie in Wes-Australië het ’n waarskuwing uitgereik oor bedrieërs wat blykbaar op Suid-Afrikaanse huiseienaars in dié gebied toegeslaan het, berig Beeld.

Die besonderhede van minstens twee Suid-Afrikaners wat duur huise daar het is só by eiendomsagente verander dat die agente al begin het om die huise te herverkoop.

Die eienaars se e-pos is vermoedelik onderskep om sodoende van hul persoonlike gegewens vas te stel, het Alan Hynd van die departement van verbruikersbeskerming in Wes-Australië gesê.

Die bedrieërs het hulle dan met hul eie vals besonderhede voorgedoen as die eienaars.

Hulle het die eiendomsagente opdrag gegee om die huise te verkoop.

In albei gevalle het die agente kopieë van die eiendomme se administrasie aan die bedrieërs gestuur.

In een geval is die agente versoek om die huis te verkoop.

Die versoek is “gestaaf” met vervalste briewe van die Australiese hoë kommissariaat in Pretoria.

Die bedrogspul het op die lappe gekom toe ’n agent snuf in die neus gekry het oor die “eienaar” se “Afrika-aksent” oor die telefoon.

Die bedrogtak van die polisie in Wes-Australië ondersoek die voorgenome “transaksies” om die betrokkenes te probeer identifiseer.

Volgens sr.sers. Dom Blackshaw, die ondersoekbeampte, moet Suid-Afrikaners kennis neem van die skelms aangesien hulle moontlik by ander agentskappe ook kan toeslaan.

Navrae kan aan [e-mail] gerig word. 

– Volg Nuus24 op Twitter