Bedeesde Malema kry nie spreekbeurt by feesviering
2012-01-01 07:47
Johannesburg – Julius Malema, geskorste ANC-jeugleier, sal nie volgende Sondag moles op die verhoog in Bloemfontein kan maak nie.
’n Bedeesde Malema het aan Rapport gesê hy weet nie eens of hy ’n spreekbeurt gegun gaan word wanneer duisende mense vir die ANC se geskiedkundige eeufeesviering in die Vrystaat-stadion saamtrek nie.
Onder dié uitgelese gaste is staatshoofde, diplomate, sportleiers, kerkleiers en bekende sakelui.
“Ek weet nie of ek gaan praat nie,” het hy in ’n telefoniese gesprek gesê.
“Maar ek gaan vir seker dáár wees om na die president se toespraak te luister, of hulle (die ANC) my ’n (spreek)beurt gee of nié. Dis belangrik.”
Dit blyk die ANC gaan vanjaar afwyk van vorige 8 Januarie-verrigtinge deur nie sy alliansie-vennote of leiers van ANC-strukture soos die jeugliga op die verhoog te laat praat nie.
Die amptelike verduideliking is dat daar te min tyd vir boodskappe ter ondersteuning van die ANC is.
’n Senior alliansieleier meen egter dit is waarskynlik ’n taktiese skuif om Malema van die verhoog te hou en te verhinder dat hy pres. Jacob Zuma in die verleentheid stel.
Malema kan egter nie alleen gemuilband word nie; dus geld dieselfde reëling almal.
“Die gebeure op die verhoog gaan beperk word,” het dié leier gesê.
“Sover ons weet, gaan daar nie geleentheid wees om direk (van die verhoog af) ondersteuningsboodskappe te gee nie.
“Dit gaan op pamflette gedruk en op die webblaaie geplaas word.”
Intussen wou Malema nie uitwei oor sy appèlaansoek teen die besluit van die ANC se nasionale tugkomitee om hom vir vyf jaar uit die party en alle strukture te skors nie.
“Ek weet níks nie. Praat met Cyril Ramaphosa (voorsitter van die ANC se nasionale appèlkomitee),” het hy aan Rapport gesê.
Daar was vroeër sprake dat die ANC die appèlproses vóór die eeufeesvieringe in Bloemfontein agter die rug sou kry. Dit sal egter eers later vandeesmaand afgehandel word.
Intussen is Malema steeds die ANC-jeugleier hangende die uitslag van die proses.
Mnr. Keith Khoza, ANC-woordvoerder, het by navraag gesê die program vir die saamtrek in die Vrystaat-stadion is nog nie gefinaliseer nie.
“Ons sit met tydbeperkings en ons is nie seker of daar soos met ander jare geleentheid sal wees vir ons vennote om op die verhoog te praat nie.
“Ons wil die staatshoofde nie ure lank in die stadion laat sit nie.”
Zuma sal die hoofspreker wees by dié geleentheid, wat eers om 15:00 begin.
Buiten om die ANC se prioriteite vir 2012 uit te stippel, sal Zuma waarskynlik ook fokus op die party se ontstaan, sy ryk geskiedenis en die bevrydingstryd.
Afrika-lande en die internasionale gemeenskap se bydrae in die stryd teen apartheid sal waarskynlik ook aangeprys word.
– Volg Nuus24 op Twitter
- Rapport