Beampte se lyk gekry ná diefstal
2011-12-06 09:02
Bloemfontein – ’n Sekuriteitsbeampte van die provinsiale verkeersdepartement het homself die naweek opgehang nadat hy ’n voertuig van die departement in Welkom gesteel, daarmee in ’n ongeluk was en daarna ’n tweede gemerkte voertuig gesteel het.
Piet Tamane (33) het dié tweede voertuig, ’n splinternuwe Chevrolet Cruze, met die sleutels daarin voor die hek van die kantoorbestuurder op Hoopstad gelos.
Dit was nadat hy op die dorp opgemerk is, en toe hy deur verkeersbeamptes gekonfronteer is, gesê het hy is daar om aan die Vrystaatse LUR vir vervoer verkeershulp te verleen.
Tamane se pa het Sondagoggend omstreeks 06:00 op sy lyk in die huis afgekom.
Sers. Ian Gaobepe van die polisie sê ’n geregtelike ondersoek word op Hoopstad gedoen. Die rede vir Tamane se optrede en selfmoord is nie bekend nie, maar Volksblad verneem hy en sy vriendin het Saterdag voor die gebeure ’n woordewisseling gehad.
Tamane het die eerste voertuig Saterdagaand uit die parkeergebied van die provinsiale verkeersdepartement in Koppie Alleenweg gesteel, en op die pad tussen Welkom en Odendaalsrus daarmee oor ’n verkeersirkel gejaag en dit beskadig.
Hoe hy toe in Welkom teruggekom het om die tweede voertuig te steel, en hoe hy toegang tot die toegesluite parkeergebied en die motorsleutels gekry het, word deur die polisie ondersoek.
Zolile Walaze, provinsiale woordvoerder van die verkeersdepartement, sê ’n ondersoek is aan die gang. Hy sê die eerste motor is erg beskadig.
Hy sê verkeersbeamptes wat die gemerkte voertuig op Hoopstad opgemerk het, het Tamane gevra wat hy daar daarmee doen, waarop sy antwoord was dat hy die LUR vergesel het omdat daar niemand anders was wat dit kon doen nie.
Die verkeersbeamptes het toe hul hoof gebel, wat die motor later buite sy hek gekry het.
Volg Nuus24 op Twitter
- Volksblad