Beampte het ET-verdagte met die dood gedreig

2012-02-03 12:20

Ventersdorp – Die ondersoekbeampte in die Eugene Terre’Blanche-moordsaak het gedreig om een van die beskuldigdes dood te maak, het die hooggeregshof in Ventersdorp Vrydag gehoor.

“Jy sal reël dat hy (die plaaswerker Chris Mahlangu) na ‘n landdros geneem word om ‘n verklaring af te lê en as hy nie doen wat jy sê nie sal jy hom doodmaak,” het Mahlangu se prokureur, Kgomotso Tlouane, aan die ondersoekbeampte gesê.

Lt. kol. Tsietsi Mano het dit ontken.

Mano het Donderdag getuig dat beide Mahlangu en die jeugdige se regte aan hulle voorgelees en aan hulle verduidelik is nadat hulle in hegtenis geneem is.

Mahlangu en die minderjarige, wie se naam nie bekendgemaak mag word nie, word daarvan aangekla dat hulle Terre’Blanche in sy plaashuis buite Ventersdorp in April 2010 in die Noordwes doodgeslaan het.

Albei het onskuldig gepleit op aanklagte van moord, huisbraak en roof met verswarende omstandighede. Mahlangu beweer hy het uit selfverdediging opgetree. Die tiener ontken betrokkenheid in die misdaad.

Mano het getuig dat ‘n reëling op die aand, wat die twee in hegtenis geneem is, getref is om hulle van Ventersdorp na Klerksdorp te verplaas.

Tlouane het gevra hoekom Mano gevoel het dit is nodig dat hulle oorgeplaas word.

“Ventersdorp is nog altyd in die nuus as gevolg van rassistiese konfrontasies,” het Mano gesê.

Hy was bekommerd dat Terre’Blanche, wat die leier van die Afrikaner Weerstandsbeweging (AWB) was, se ondersteuners dalk wet in eie hande sal neem en die polisiekantoor aanval.

“Daar was baie spanning,” het hy gesê. Dit is as voorsorgmaatreël gedoen.

Mahlangu en die jeugdige se regsverteenwoordiger het ‘n vorige uitspraak wat teen Mano gelewer is, tydens die verhoor genoem.

Regter John Horn het gesê hy sal moet oplees oor die saak en dan besluit of hy vrae rondom dit sal toelaat.

Die uitspraak waarna verwys word, is in 2008 in die Pretoria-hooggeregshof in die saal teen Mano en talle ander polisiebeamptes gemaak.

Hulle moes meer as R500 000 in skadevergoeding aan Madimetja Phineas Kutumela, wat in 2004 verkeerdelik in hegtenis geneem is in verband met die ontvoering en moord van konst. Francis Rasuge, betaal.

Volgens die uitspraak het Mano en ander lede van die polisie Kutumela aangerand en kwaadwillige aanklagte teen hom gebring.

– Volg Nuus24 op Twitter

- SAPA