Barnard se broer praat sy hart uit
2010-08-20 07:33
Die Burger
Kaapstad - Drie dekades nadat hy weens politieke redes gevra is om by Groote Schuur-hospitaal te loop, het dr. Marius Barnard Donderdag teruggekeer en sommer sy jare lange stilswye oor sy bekende hartchirurg-broer, Chris, verbreek.
Hy het gesê “dit is ’n bekende feit dat ek en my broer nie om dieselfde stoof vir hitte gesit het nie”.
Barnard en Simon Norval is pas klaar met die manuskrip van ’n boek getiteld Defining Moments, wat “alles oor die eerste hartoorplanting” en vele ander feite “vir die eerste keer” sal vertel.
Hy wou nie verklap hoeveel harte hy self op sy dag oorgeplant het nie. “Dit was minder as ’n honderd, en ek lieg nooit,” is al wat hy wou sê.
“Oorplantings was Chris se private property en wanneer hy oorsee was met die vroue, het ons die kans gekry om harte oor te plant,” het hy bygevoeg.
Barnard (82) het by die Hart van Kaapstad-museum hier na die oorspronklike teaters kom kyk en ook die wêreld se langslewende hartoorplantingspasiënt, Paul Thesen (45) van Oos-Londen, weer ontmoet. In 1979 was Thesen as 14-jarige ook die jongste hartontvanger nóg en (dr. Marius) Barnard het dié operasie uitgevoer.
Die oorspronklike teaters waar die skenkerharte verwyder en die eerste oorplantings gedoen is, asook ander lokale wat gebruik is tydens dié geskiedkundige operasie, is deel van die museum. Barnard en Thesen het saam deur dié lokale gestap.
In die operasie wat Barnard op Thesen gedoen het, is sy eie hart behou, met die skenkerhart wat as abbahart oorgeplant is. Die skenkerhart was dié van Caroline Munnik, dogter van dr. Lapa Munnik, ’n voormalige minister.
’n Tweede abbahart is later oorgeplant en die skenker was ’n jong meisie van die Oos-Kaap. Thesen vertel hy het vandag een hart en klein deeltjies van ’n ander hart. “Ek voel goed,” het hy aan Die Burger gesê.
Volgens Barnard was hy die laaste persoon om in dié teater te opereer. “Ek het eendag nog so gestaan toe daar skielik iets met die lugverkoelingstelsel fout gaan – dit het ’n wolk stof uitgeblaas. Daarna het hulle die teaters gesluit.”
Hy is skielik weg by Groote Schuur. “Daar is vir my gesê ek moet loop omdat ek ’n benoeming as PFP-kandidaat aanvaar het. Dit was lekker om te loop.”
Daar sal meer oor politiek en sy stryd met kanker in die boek wees, aldus Barnard.
Volg Nuus24 op Twitter
- Die Burger