Barbie-slagoffer: Diere vreet al aan haar lyk
2010-03-09 08:03
Virginia Keppler
Johannesburg - Wilde diere het al aan die hande en voete van Jeannine du Plessis (21), ’n slagoffer van Cézanne Visser, begin vreet toe die polisie haar lyk eergisteroggend in ’n stuk veld in Botswana gevind het.
Marié du Plessis, Jeannine se ma, het gister gesê haar kind was volgens die polisie al twee dae lank dood toe hulle haar lyk in die Kgalagadi-omgewing gekry het waar sy aan ’n boom gehang het.
Volgens haar ma was sy MIV-positief.
Du Plessis het gesê Johan Fourie, Jeannine se vriend wat in Botswana woon en by wie sy gewoon het, het haar lyk gister gaan uitken.
Haar dogter se lyk sal waarskynlik tussen vandag en môre na Suid-Afrika gebring word.
“Die nadoodse ondersoek is vandag gedoen. Haar lyk gaan nou gebalsem word voordat die departement van buitelandse sake van Botswana dit tot by die Suid-Afrikaanse grenspos bring waar haar pa en die begrafnisondernemer haar gaan inwag.”
Volgens Du Plessis sou Jeannine ses weke in Botswana gebly het voordat sy en Fourie ’n week lank in Suid-Afrika sou kom kuier.
“Jeannine was ’n wonderlike kind. Cézanne het my kind se lewe verwoes.”
Visser is onlangs tot sewe jaar tronkstraf gevonnis weens seksdade met jong vroue en kinderhuismeisies.
In Jeannine se geval is sy van verkragting aangekla, maar dit kon nie bo redelike twyfel bewys word nie en is sy aan onsedelike aanranding skuldig bevind.
Tydens Visser se vonnisoplegging het waarnemende regter Chris Eksteen gesê Jeannine se lewe is uitmekaar geskeur.
“Ek persoonlik voel sewe jaar is hopeloos te min,” het Du Plessis gesê.
Visser is tans op borgtog van R10 000 hangende haar aansoek om verlof om te appelleer.
Adv. Johann Engelbrecht SC, Visser se regsverteenwoordiger, het gister gesê Jeannine se selfmoord sal geen invloed op Visser se aansoek hê nie.
Volgens hom kan daar ook nie beweer word dat Visser die oorsaak van die selfmoord was nie.
Du Plessis het gesê: “Jeannine het ná daardie voorval met Cézanne verander en weggeloop van die huis af.
“Sy het met Nigeriërs en dwelms betrokke geraak en is later MIV-positief getoets.
“Sy het altyd gesê haar baba is ’n wonderwerk, want sy is negatief.
“Ons het haar onlangs vir die derde keer sedert haar geboorte getoets en sy is steeds negatief.”
Du Plessis het gesê haar kleinkind is Jeannine se ewebeeld. “Ek maak Jeannine van voor af groot.”
- Beeld