Barbie se pyn 'erger as straf in tronk’
2010-02-26 07:50
Sonja Carstens
Johannesburg - Cézanne Visser voel verneder en diep seergemaak. Sy beskou haarself as die “hoofslagoffer” van Dirk Prinsloo, haar voormalige minnaar, nadat sy Woensdag in die hooggeregshof in Pretoria tot sewe jaar tronkstraf gevonnis is, het prof. Johann Lemmer, haar stiefpa, gister gesê.
“Dit was vir haar verskriklik vernederend toe sy ten aanskoue van flitsende kameras herhaaldelik geboei moes word terwyl die hofverrigtinge aan die gang was.
“Ook die uitlatings van (waarnemende) regter Chris Eksteen en die publiek het haar diep seergemaak en sy is verslae, maar vol moed dat haar aansoek om verlof om in die appèlhof in Bloemfontein te appelleer, suksesvol sal wees,” het Lemmer, ook president van Sexology SA, gesê.
Hy en Susan Lemmer, Visser se ma, wou by ’n hofordonnans weet of dit regtig nodig is om Visser telkens met hofverdagings te boei.
Die ordonnans het kortaf geantwoord dat Visser soos enige ander gevonniste misdadiger behandel word.
Visser is later op borgtog van R10 000 vrygelaat hangende haar aansoek om verlof om te appelleer.
Volgens prof. Lemmer het Visser tydens die vonnisverrigtinge ’n kalmeermiddel gebruik en het sy in die hofselle gehuil.
“Vir Susan was dit geweldig traumaties om te sien hoe haar enigste kind vir die tweede keer in agt jaar voor haar geboei word.
“Sy was ook teenwoordig toe Cézanne en Prinsloo in Desember 2002 in hul huis in Centurion, Pretoria, deur lede van die polisie se spesiale taakmag in hegtenis geneem is.”
Volgens prof. Lemmer het Visser se vorige werkgewer haar summier in die pad gesteek ná haar skuldigbevinding verlede jaar op 11 aanklagte van onder meer die onsedelike aanranding van kinders.
Sy het voor haar afdanking ’n pos as administratiewe bestuurder beklee en ’n “onberispelike werkrekord” gehad.
“Daar is aan haar gesê hulle het geen keuse as om haar te ontslaan nie. Sy het reeds alles verloor.
“Cézanne was van 2001 vasgevang in ’n meester/slaaf-verhouding met Prinsloo. Sy was die slaaf wat nie gedink het nie, maar net gedoen het.
“Sy was ’n gevangene in die verhouding en die pyn waardeur sy die afgelope agt jaar is, is erger as tronkstraf.
“Die regter sien haar berou as lippetaal en haar trane as pogings om te manipuleer, hoewel die deskundiges dit eens was dat sy diep berou het.
“Haar persoonlikheid het gedurende haar verhouding met Prinsloo totaal gedisintegreer,” het prof. Lemmer gesê.
Prinsloo het in 2006 midde-in die verhoor landuit gevlug nadat sy verhouding met Visser verbrokkel en sy teen hom gedraai het. Hy is verlede maand in Belo-Rusland vir 12 jaar tronk toe gestuur nadat hy probeer het om ’n bank met ’n speelgoedgeweer te beroof.
Adv. Johann Engelbrecht SC, Visser se regsverteenwoordiger, het gister gesê hy hoop om haar aansoek teen 20 Maart by die appèlhof in te dien.
- Beeld