'Barbie moenie tronk toe gaan'
2010-02-08 21:24
Pretoria - 'n Forensiese kriminoloog meen die veroordeelde seksmisdadiger Cézanne Visser, oftewel adv. Barbie, moenie tronk toe gaan vir haar misdade nie.
Ian Sonnekus het Maandag in die Pretoriase hooggeregshof ter versagting voorgestel dat die geskikte straf 'n opgeskorte vonnis of streng korrektiewe toesig en rehabilitasie sal wees.
"Die oortreder het berou getoon oor die voorvalle en die traumatiese effek wat dit op die slagoffer gehad het. Die opregte berou van die oortreder teenoor die slagoffers dui daarop dat rehabilitasie reeds onderweg is," het hy gesê.
Sonnekus het sy voorstelle gebaseer op Visser se getuienis tydens die verhoor en daaropvolgende konsultasie met haar, haar familie en kollegas.
Hy het bygevoeg dit is Visser se eerste oortreding.
Ander faktore ter versagting sluit in Visser se erge depressie voor en tydens die tydperk wat die misdade gepleeg is.
Die depressie het ook bygedra tot die feit dat sy nie die manipulasie van die vermeende stoker van die misdade, haar voormalige kêrel, Dirk Prinsloo, kon weerstaan nie.
Visser is in Oktober skuldig bevind op 11 van die 14 aanklagtes teen haar.
Sy het onder meer tereggestaan op aanklagte van onsedelike aanranding, besit en vervaardiging van kinderpornografie en aktiewe deelname in seksuele aktiwiteite Prinsloo se huis.
– Sapa