Bank waarsku oor vals e-posse
2010-01-14 21:11
Johannesburg – Een van Suid-Afrika se grootste banke het Donderdag sy kliënte gewaarsku om nié hul internet-bankbesonderhede aan enigiemand bekend te maak nie.
Die waarskuwing het verduidelik dat enige e-posse wat klaarblyklik van Absa af kom en verbruikers vra om hul aantekenbesonderhede te verskaf, nie eg is nie.
"Een e-pos wat die rondte doen beweer dat Absa-rekeninghouers kwalifiseer om van hul bankkostes in 2009 te herhaal, mits hulle 'n skakel in die e-pos volg en hul persoonlike bankbesonderhede daar intik," het die bank in 'n verklaring gesê.
Nog 'n e-pos beweer Absa is besig om hulle aanlynsekuriteit op te skerp ná iemand probeer het om onwettig toegang tot die stelsel te kry.
Dit vra van gebruikers om 'n skakel te volg om sy/haar identiteit te bevestig en om te voorkom dat hul internet-bankdienste nie onbruikbaar raak nie.
"Hierdie is vals e-posse waarin elke moontlike sielkundige taktiek, van skok-, uitlok-, bangmaak- tot dreigtaktieke, direk deur die bedrieërs gebruik word om hul moontlike slagoffers te bereik," het Absa gesê.
Die bank het hul kliënte aangeraai om die e-posse uit te wis.
"Kliënte moet weet enige e-posse wat vir persoonlike inligting vra is verdag, veral wanneer dit by bankrekening- en kredietkaartnommers, sleutelwoorde en identiteitsnommers kom."
–Sapa