Bank hof toe gesleep oor vrou se affair
2012-12-21 14:53
Johannesburg – 'n Johannesburgse man het FirstRand Bank probeer dagvaar nadat sy vrou glo op haar kollega verlief geraak het terwyl sy 'n werknemer by die bank was, het die Star Vrydag berig.
"Daar moet 'n slagspreuk wees. Ex curia Johannesburgensis
semper aliquid novi: daar is altyd iets nuuts uit die Johannesburgse hoërhof," het regter Nigel Willis in sy bevinding gesê.
"Ek weet dat 'n regsgeding verbeeldingryk kan wees hier in Johannesburg, maar die een verdien 'n spesiale prys."
In 'n aansoek wat voor die hof gebring is het Dessie Ramnath beweer dat die bank verantwoordelik was vir die pyn en lyding wat sy vrou se buite-egtelike verhouding veroorsaak het.
Willis het gesê die bewering is bisar en duidelik sonder enige meriete.
"Ek is redelik seker dat ons nie in hierdie land gaan begin om toe te laat dat werkgewers vergoeding betaal omdat mense by die werk verlief raak nie."
"Dit gebeur die heeltyd en sal aanhou gebeur tot die koeie huis toe kom," het Willis bygevoeg.
Volg Nuus24 op Twitter.
- SAPA
