Bande brand toe kinderhuis moet ontruim
2009-11-26 14:12
Johannesburg – Sowat 400 inwoners van Atlantis naby Kaapstad het Donderdag bande gebrand en polisie verhoed om mense by ‘n kinderhuis in die area uit te sit, het ‘n lid van die gemeenskap gesê.
“Gemeenskapslede staan by die hek en weier dat die polisie ingaan by die kinderhuis,” het Fiona Ranck gesê.
“Hulle glo dat die kinderhuis aan die gemeenskap behoort,” het sy gesê.
Volgens Ranck het sowat 40 polisielede probeer om ‘n familie en 60 kinders en hul besittings van die perseel te verwyder.
Matilda en Ronald Koopman, wat in beheer is van die Ebenezer kerk, het vir jare in die huis gewoon saam met hul ses kinders.
Hulle het in 2005 begin om kinderkinders en mishandelde kinders in te neem.
Met die hulp van Switserse befondsing wat deur die Atlantis Forum verkry is, is ‘n nuwe, groter huis op die perseel gebou om plek te maak vir al die kinders.
Die kinderhuis was nie geregistreer nie en die departement van sosiale dienste het vroeër die maand gedreig om dit te sluit omdat dit onwettig is.
Die Koopmans het probeer om gemeenskapslede betrokke te kry in die administrasie van die kinderhuis, maar die forum het beweer dat die huis hulle eiendom is en het die saak by die hof aangemeld, waarna hulle ‘n uitsettingsbevel ontvang het, het Ranck gesê.
Volgens die Wes-Kaapse ANC-organiseerder Mandla Nqwane, het die dooiepunt tussen die polisie en die gemeenskap drie dae gelede begin.
“Die gemeenskap betoog [teen] die verwydering van hierdie familie en hulle sal nie weggaan nie.
“Hulle [gemeenskapslede] is nou al vir drie dae hier. Sommige van hulle gaan na hulle huise om te eet en keer dan terug,” het hy gesê.
Die Koopmans se prokureurs gaan Donderdagmiddag ‘n ernstige aansoek indien om die uitsetting te keer.
- Sapa