Balju maak lys van Malema se bates
2010-10-19 07:31
Johannesburg - Die balju van Sandton het Julius Malema, leier van die ANC-jeugliga, se luukse huis in Johannesburg Maandag besoek en ’n lys van sy bates gemaak.
Só het mnr. Mbuyiselo Botha, woordvoerder van die Sonke Gender Justice Network, Maandagmiddag gesê.
Die balju kan dus nou moontlik binnekort op genoeg van Malema se besittings beslag lê om die R50000 te verhaal wat hy nagelaat het om ingevolge ’n hofbevel aan People Opposing Women Abuse (Powa) te betaal. Hy het ook nie die openbare verskoning aangeteken soos hy deur die gelykheidshof gelas is om te doen nie. Die gelykheidshof het Malema in Maart skuldig bevind op aanklagte van haatspraak en teistering.
Botha het gesê hy is gelukkig dinge loop nou einde se kant toe.
“Vandag het gewys niemand in Suid-Afrika is bo die wette van die land verhewe nie,” het hy gesê.
Botha het nou die mag om sy prokureurs opdrag te gee om die balju te vra om beslag te lê op bates ter waarde van R50000.
Sonke Gender Justice Network het Malema gelykheidshof toe gesleep nadat hy verlede jaar sy mond uitgespoel het oor die vrou wat pres. Jacob Zuma van verkragting beskuldig het.
Malema het ná die uitspraak aangedui hy wil appelleer.
Die 60 dae wat hy daarvoor gehad het, het intussen verstryk sonder dat hy appèldokumente ingedien het.
Nie Tumi Mokwena, Malema se prokureur, Floyd Shivambu, ANC-jeugliga-woordvoerder, of Malema self het op navrae gereageer nie.
- Die Burger