Balju lê beslag op Cope-eiendom
2012-01-20 14:35
Johannesburg – Die balju van die hof het ‘n klopjag uitgevoer by Cope se kantore in Johannesburg om beslag te lê op goedere ter waarde van R82 500, het The Star Vrydag berig.
Dít kom ná 'n beslissing van die Kommissie vir Versoening, Bemiddeling en Arbitrasie (KVBA) oor 'n werknemer wat onregverdig afgedank is.
Nietemin kon die balju slegs daarin slaag om Woensdag beslag te lê op goedere ter waarde van R8 000 in die klopjag, het die koerant berig.
Die items het ‘n paar rekenaars, ‘n faksmasjien met die party se medestigter, Mbhazima Shilowa, se naam op en ‘n mikrogolfoond ingesluit.
Sithembiso Khanyile het die KVBA in Julie genader toe sy salaris oor drie maande gehalveer is en hy daarna afgedank is.
Hy het glo gedink die afname in sy salaris was as gevolg van sy ondersteuning van Shilowa in die faksie-gevegte vir die party se leierskap.
Cope se sekretaris, Lyndall Shope-Mafole, het aan die koerant gesê dat die party die geldigheid van die beslaglegging moet bevestig, aangesien dit nie die eerste keer was wat die balju besoek afgelê het by die kantore nie.
“Baie mense wat afgedank is het ons al in ‘n groot klomp skuld laat beland. Een van die redes hoekom ons Shilowa moes afdank, was omdat hy ons in baie skuld geplaas het,” het sy gesê.
– Volg Nuus24 op Twitter
- SAPA
