Balju klop weer aan Gauteng-premier se deur
2012-01-29 14:27
Johannesburg – Die balju het vir die tweede keer in drie dae aan die deur van die Gautengse provinsiale regering geklop weens die provinsie se versuim om 'n hofbevel te gehoorsaam, het die DA Sondag gesê.
Die balju het Vrydag by die kantoor van die Gautengse premier, Nomvula Mokonyane, opgedaag om meubels op te skryf ná die gesondheidsdepartement versuim het om R6.3 miljoen rand te betaal weens 'n eis as gevolg van mediese nalatigheid, het Jack Bloom, DA-woordvoerder, gesê.
Die saak, wat verlede jaar op 5 September in die hooggeregshof in Pretoria afgesluit is, is deur Shabbier Nagel teen die provinsiale regering aanhangig gemaak. Hy is in die Steve Biko Akademiese Hospitaal in Pretoria opgeneem vir 'n hartoperasie, maar sy regterbeen is geamputeer.
Volgens Bloom het die balju Vrydag by die premier se kantoor aangekom en die grootste deel van die oggend met die premier se regsverteenwoordigers vergader. 'n Ooreenkoms is bereik waarvolgens die provinsiale regering die volle bedrag teen Vrydag, 3 Februarie sal betaal.
"Die vertraging in die betaling het, teen 'n rentekoers van 15.5%, nog R320 000 by die bedrag gevoeg wat deur die Gautengse provinsiale regering betaal moet word. Dit kon gespaar gewees het deur betyds te betaal."
Dieselfde toneel het hom Woensdag afgespeel toe die balju by Mokonyane se kantoor opgedaag het om meubels op te skryf omdat die provinsiale regering versuim het om 'n bedrag van R9.25 miljoen se skadevergoeding uit te betaal aan 'n seun wat breinskade opgedoen het weens nalatigheid by 'n openbare hospitaal.
– Volg Nuus24 op Twitter.
- SAPA