Baksteen tref baba teen kop
2010-01-01 10:56
Hillbrow - Nege mense, insluitend 'n 11 maande oue baba, is in die hospitaal opgeneem ná hulle tydens Nuwejaarsvierings in Hillbrow beseer is, het polisie in Gauteng gesê.
Die insidente het plaasgevind tussen 23:30 Donderdag en 01:30 Vrydag, het supt. Lungelo Dlamini gesê.
'n Baba is ernstig beseer toe 'n baksteen haar teen die kop getref het, het hy gesê. Sy is in 'n kritieke toestand by die Charlotte Maxeke Johannesburg Akademiese Hospitaal.
Sommige van die ander beseerdes is gesteek tydens onderonsies tussen besope partytjiegangers, en ander is deur voorwerpe getref tydens Nuwejaarsvierings, het Dlamini gesê.
Hy het gesê 10 mense is in sentraal Johannesburg in hegtenis geneem ná hulle 'n bottel by hulle woonstel se venster uitgegooi het. Dit het 'n polisievoertuig getref wat Mooi- en Breëstraat gepatrolleer het.
"Die beampte [wat die voertuig bestuur het] is nie beseer nie, maar die windskerm van die polisiemotor is beskadig".
Polisie het 'n klopjag op die woonstel uitgevoer. Hulle het op 10 dronk mense in die woonstel afgekom, en hulle in hegtenis geneem vir kwaadwillige saakbeskadiging.
– Sapa