Baie hoës by ‘einde van Sisulu-liefdesverhaal’
2011-06-12 08:04
Die “wonderlike” liefdesverhaal van Albertina Sisulu en haar man, wyle Walter Sisulu, is met haar afsterwe volbring.
Max Sisulu, oudste seun van die ontslape struggle-veterane, het gister by sy ma se begrafnisdiens dié stelling oor sy ouers gemaak en hartseer bygevoeg dat hulle “nou nooit weer van mekaar geskei sal wees nie”.
Honderde mense, ook regeringsamptenare en ANC-swaargewigte, het van oor die land en Afrika heen Sisulu (92) se amptelike staatsbegrafnis in die Orlando-stadion in Soweto bygewoon.
Onder die hooggeplaastes was pres. Jacob Zuma, adj.pres. Kgalema Motlanthe, Kenneth Kaunda, oudpresident van Zambië, Jakaya Kiwkete, president van Tanzanië, en Morgan Tsvangirai, eerste minister van Zimbabwe.
Vir oudpres. Nelson Mandela was dit egter “te pynlik om persoonlik van ’n suster, vriend en trooster afskeid te neem”, maar sy vrou, Graça Machel, het sy boodskap aan begrafnisgangers voorgelees. Mandela het geskryf die jare eis sy tol en “kamerade en vriende sterf nou een vir een”.
“Elke keer as nog een sterf, voel dit soos ’n stuk van my wat weggesny word. Nie een was egter so seer soos toe jy, my suster, gesterf het nie. Jy is waarlik een van die grootste Suid-Afrikaners.”
Zuma het in sy lofrede gesê Sisulu se afsterwe is ’n skerp herinnering dat ’n “uitstaande, toegewyde en roemryke generasie van leiers” besig is om uit te sterf.
“Hulle het hul deel gedoen en ons na vryheid gelei. Ter ere aan hulle moet ons hul visie van ’n nie-rassige, demokratiese en vooruitstrewende Suid-Afrika realiseer.
“Ons begrawe ’n staatmaker en moeder van die nasie wat met ’n mengsel van veerkragtige vermoë en sielskrag koloniale onderdrukking en apartheid beveg het terwyl sy ook ’n sagte plekkie vir armes en onderdruktes gehad het.”
Sisulu is later langs haar man in die Newclare-begraafplaas begrawe.
- Volg Nuus24 op Twitter.
- Rapport
