Babas wat sterf 'is nie 'n krisis'
2011-03-13 11:05
Johannesburg - Minstens 81 babas het in Januarie en Februarie in twyfelagtige omstandighede in ’n hospitaalkompleks in Oos-Londen gesterf, maar dié provinsie se gesondheidsowerheid sê dit is nie ’n krisis nie.
Volgens die Oos-Kaapse gesondheidsdepartement moet die provinsie se inwoners “hul leefstyl begin verander”.
Die 81 sterftes het voorgekom in twee hospitale wat deel is van dieselfde kompleks in Oos-Londen.
In die Cecilia Makiwane-hospitaal het 44 babas die afgelope twee maande gesterf, en in die Mt. Frere-hospitaal het nóg 37 binne net 48 uur gesterf.
Die Mt. Frere-hospitaal was vier jaar gelede ook in die nuus nadat talle babas daar gesterf het, onder meer in broeikaste, weens “nalatigheid en swak bestuur”.
Khaya Sodidi, Oos-Kaapse organiseerder van die verpleegstersvakbond Denosa, het die afgelope week gesê die gesondheidstelsel in die Oos-Kaap stort in duie.
“Die babasterftes kom al sedert 2008 voor. Daardie jaar het ses babas in verdagte omstandighede in staatshospitale gesterf. In 2009 was dit 150 en verlede jaar 180.
“Denosa het dus ’n probleem met die provinsiale owerheid se stelling dat daar geen krisis is nie. Dit is ’n reuse-krisis.”
En volgens Sodidi is die babasterftes net die puntjie van die ysberg.
“Daar is te veel korrupsie in dié departement. Talle amptenare word tans ondersoek weens bedrog van R45miljoen waarmee medisyne en toerusting aangekoop moes word.”
Volgens Sodidi het Denosa se eie ondersoeke oor die babasterftes getoon daar is talle bydraende faktore.
“Die grootste is die chroniese tekort aan verpleegsters by staatshospitale.
“Altesame 35% van die poste is vakant. Denosa wys die departement al sedert 2004 daarop, maar daar is ’n moratorium op die opleiding van nuwe verpleegsters vir 2011 en 2012.
“Dít sodat die departement ’n agterstand van R1,2 miljard op sy begroting kan uitwis. Dit beteken 700 nuwe verpleegsters per jaar kom nou nie in die hospitaalstelsel nie.”
Hy sê daar ook ’n tekort aan mediese toerusting en toerusting word dikwels nie in stand gehou nie.
Sizwe Kupelo, woordvoerder van die Oos-Kaapse departement van gesondheid, sê die Cecilia Makiwane-sterftes word tans ondersoek.
“Ons is bekommerd oor die hoë sterftesyfer onder babas, maar daar is nie ’n krisis nie. In dieselfde tydperk is 702 gesonde babas in dié hospitaal gebore.”
Kupelo sê baie babas sterf weens die vigspandemie.
“Verder besoek swanger vroue vals dokters vir aborsies en as dit skeefloop, sit staatshospitale daarmee opgeskeep.
“Ons moet mense ook opvoed om nie te rook of alkohol te misbruik terwyl hulle swanger is nie, en dat mans vroue nie tydens swangerskap moet aanrand nie.
“Dit is demoraliserend vir dokters en verpleegsters as die media sensasioneel oor die sterftes berig.
“Dit jaag net mense weg van staatshospitale af.”
Syfers
- 2005: Mahatma Gandhi-gedenkhospitaal, Durban: 22 babas sterf weens klepsiella. Die rede was “’n gebrek aan geld en hulpbronne”.
- 2007: Mt. Frere-hospitaal, Oos-Londen: 104 babas sterf tussen Januarie en Mei weens nalatigheid en swak bestuur.
- 2007: Prince Mshiyeni-hospitaal, Durban: 6 babas sterf weens klepsiella. Oorvol sale, min personeel, vuil toerusting en verpleegsters met vuil hande is die redes.
- 2008: Cloete Joubert-hospitaal, Barkly-Oos: 78 babas sterf weens besmette water. Die hospitaal het te min binneaarse vloeistof en antibiotika gehad.
- 2009: Mahatma Gandhi-gedenkhospitaal, Durban: 407 babas sterf: 285 aan TB-verwante siektes, 52 vroeggebore babas en 64 weens lae geboortegewig.
- 2010: Charlotte Maxeke-hospitaal, Johannesburg: 6 pasgebore, ondergewig babas sterf weens diarree. Die saal was oorvol.
- 2010: Natalspruit-hospitaal in Kathlehong: 11 babas sterf. Sommige is doodgebore en ander was ondergewig.
- 2010: Nelson Mandela-hospitaal, Mthatha: Die Oos-Kaapse gesondheidsdepartement bevestig 181 sterftes.
- Rapport