Babas is ‘bloot weggegooi’
2010-11-05 08:00
Johannesburg - Gautengse lykhuise ontvang al hoe meer lyke van weggooibabas wat in vullisblikke en op ashope gelos is.
“Ons sien veral ’n toename in die Johannesburgse middestad en noordwestelike voorstede, maar ons weet nie hoekom nie,” het prof. Jeanine Vellema van die Johannesburgse forensiese patologiediens Donderdag gesê.
Verlede jaar se statistieke van tien lykhuise in die provinsie is gister bekend gemaak.
Navorsers van die Mediese Navorsingsraad (MNR) en Unisa het inligting ontleed om na die oorsake vir onnatuurlike sterftes in die provinsie te kyk.
Geweld was die hoofoorsaak (32,4%), gevolg deur padongelukke (28,7%) en selfmoord (11,3%).
446 van die 11 329 sterftes wat ondersoek is, is dié van babas wie se doodsoorsake nie bepaal kon word nie.
Vellema het verduidelik dit sluit die lyke van geaborteerde fetusse en weggooibabas in.
Sommige van die fetusse was op ’n lewensvatbare ouderdom.
“Ons weet nie of mense nie weet wat om te doen met babas wat tydens of kort ná geboorte doodgaan nie. Die mense gooi hulle bloot weg.”
Die verslag het getoon meer as agt uit elke tien mense wat weens geweld, padongelukke of selfmoord dood is, was mans.
Volgens mnr. Hilton Donson, ’n koördineerder van die MNR se nasionale moniteringstelsel van sterftes weens beserings, is 3 284 mense in padongelukke dood. 1 346 mense is doodgeskiet, 1 040 is doodgesteek, 922 is met ’n stomp voorwerp doodgeslaan en 89 mense is verwurg of versmoor.
Meer voetgangers is op die paaie doodgery as die totale getal bestuurders en passasiers wat verongeluk het.
Luidens die verslag het byna die helfte van mense wat in geweldsvoorvalle en padongelukke dood is en getoets is, alkohol in hul bloed gehad.
Voetgangers wat doodgery is se bloedalkoholvlakke was gemiddeld vier keer hoër as die wettige perk van 0,05 g per 100 ml bloed.
Prof. Melvyn Freeman, bestuurder van nie-oordraagbare siektes in die departement van gesondheid, het gesê beter poli-siëring van dronkbestuurders en hoër belasting op drank kan dié probleem verlig.
Hy het ook na vervaardigers gekap wat die wetsvereiste verontagsaam dat gesondheidswaarskuwings ’n agtste van drankhouer-etikette moet beslaan.
Die verslag toon voorts 16 tot 17 uit elke 100 000 Gautengers het in 2009 selfmoord gepleeg.
’n Geraamde 41,6 uit elke 100 000 Gautengers sterf in padongelukke, heelwat meer as die internasionale gemiddelde van 20,8 per 100 000.
Die voorkoms van 45,1 geweldsterftes per 100 000 mense is heelwat meer as die polisie se raming van 38 per 100 000.
Dit is vermoedelik te wyte aan die verskillende maniere waarop rekord van lyke gehou word.
