Baba sterf toe hy suster oor pad volg
2010-01-06 09:30
Clarissa Venter
Port Elizabeth – ’n Babaseuntjie wat glo agter sy sussie aangekruip het toe dié oor die straat gestap het, is voor sy ouerhuis in Willowmore in die Oos-Kaap doodgery.
“Ek sien steeds my seun se lykie voor my,” het ’n geskokte Elmarie Pietersen (26) gesê.
Elviro Pietersen (1) het eergistermiddag gesterf.
“Ons dink hy het sy ouer sussie, Kaylee-Ann (3), agtervolg toe sy na die bure gestap het,” het Pietersen gesê.
Die tragedie het omstreeks 12:45 voor die gesin se huis in Boesakstraat in die Vaalblok-woonbuurt gebeur.
“Ek was in die kamer besig en het skielik mense hoor skree.
“Toe ek buitentoe gaan, het ek gesien my kind lê onder die bakkie se wiel. Ons het die ambulans gebel en Elviro is hospitaal toe gevat, maar hy is reeds by aankoms dood verklaar.”
Volgens insp. Matthews Nelane, speurdiensbevelvoerder in Willowmore, is die polisie onmiddellik ontbied.
“Die bestuurder en sy neef was in ’n bakkie en het glo aan die verkeerde kant van die pad, voor Pietersen se bure, stilgehou,” het Nelane gesê.
Die twee mans het in die bakkie gesit en gesels.
“Ná ’n rukkie het hulle vertrek en oor die kind gery.
“Hulle het aanvanklik eers gedink dis ’n klip, maar toe die passasier by die venster uitkyk, het hy gesien dis ’n kind,” het Nelane gesê.
Die polisie ondersoek ’n saak van strafbare manslag.
“Ons wag op bloedmonsters wat van die bestuurder geneem is. Die padwaardigheid van die voertuig word ook ondersoek,” het Nelane gesê.
Elviro word op 16 Januarie begrawe. Hy laat ook Kallie Booysen (24), sy pa, agter.
- Beeld