Baba sterf in motorongeluk
2012-01-03 07:46
Kimberley – Wat die begin van ’n droomvakansie sou wees, het Saterdagoggend in ’n nagmerrie verander toe ’n egpaar van Modderrivier in ’n motorongeluk naby Victoria-Wes was en hul nege maande oue babaseuntjie dood is.
Die ongeluk het omstreeks 06:00 tussen Britstown en Victoria-Wes gebeur.
Dewald Burger (34), sy vrou, Clivé (38) en hul seuns, Ewan (4) en Luka (9 maande), was op pad na Tergniet en Hartenbos om hul eerste “ware vakansie in sewe jaar sonder ’n skootrekenaar” te geniet.
Die egpaar het gister in die Mediclinic Kimberley aangesterk, waar hulle ook berading ontvang het.
“Ek is altyd so veiligheidsbewus. Almal was vasgegespe. Evan het op die sitplek gelê en slaap. Luka was in sy babastoeltjie,”
“Ek weet nie wat gebeur het nie. Ek het beheer oor die bakkie verloor. Dit het begin rol,” sê mev. Burger.
Mnr. Burger sê die bakkie het uiteindelik op sy dak geland. Hy was aanvanklik baie deurmekaar.
“Ek het my kop hard gestamp. Ek het Evan oor die pad sien loop en gehoor hy roep na sy ma.
“Toe gaan sit ek net om tot my sinne te kom,” sê hy.
“Motoriste het gestop. Daar was nie selfoonontvangs nie. Een van dié mense, Bennie Steenkamp van Victoria-Wes, het dorp toe gery om hulp te ontbied. Ons het intussen verneem ons baba is oorlede.
“Die ander mense op die toneel het al ons besittings, wat oor die toneel gestrooi was, opgetel. Ons is baie dankbaar teenoor hulle.
“Die ambulansdiens was baie vinnig op die toneel.
“Ons is na die Victoria-Wes- hospitaal geneem,” sê hy.
Die gesin is Sondag na die Mediclinic Kimberley gebring waar hulle saam in ’n private saal aansterk.
Mnr. Burger het sy skouer en elmboog beseer. Mev. Burger se lyf is vol diep snye en skraapmerke. Klein Evan het skraapwonde oor sy lyfie nadat hy eerste uit die rollende motor geval het. Almal is styf en seer.
“Luka was die vriendelikste baba ooit. Hy was mal oor swem. Ek was so opgewonde om saam met hom in die see te swem,” sê mev. Burger
Sy is ’n professionele swemafrigter, fotograaf en aanlyn-joernalis.
“Ons het natuurlik baie vrae oor hoekom dit gebeur het. Daar lê ’n lang pad voor,” sê sy.
“Gelukkig is albei families by ons om ons te onderskraag.”
Me. Burger was van 1995 tot 2000 ’n verslaggewer van Volksblad en het ook vroeër as nuuskorrespondent vir Ofm gewerk.
Haar man is ’n graanbemarker by Griekwaland-Wes-koöperasie (GWK).
Volg Nuus24 op Twitter
- Volksblad