Baba sterf by crèche in Rosestad
2011-03-15 06:55
Bloemfontein - ’n Pa van Verkeerdevlei oorweeg regstappe nadat sy babaseuntjie van nege maande in die Universitas-staatshospitaal se crèche in Bloemfontein dood is.
Phillip Geldenhuys sê hy en sy vrou, Nthabiseng, het ’n jaar en ’n half gewag vir haar om met Gabriel Giovanni, haar eersteling, swanger te word.
Sy vorige vrou, Joey (53), en húl dogtertjie, Marlise (9), is onderskeidelik weens kanker en longonsteking nadat sy waterpokkies opgedoen het, oorlede.
Gabriel, wat Mannetjie genoem is, is die afgelope tyd na die crèche gebring, want die afgetrede mnr. Geldenhuys het die gesin se huis opgeknap.
Sy vrou, ’n laboratorium-assistent van die nasionale gesondheidslaboratoriumdienste (NHLS) in die Universitas-hospitaal, het die seunjie verlede Dinsdagoggend by die crèche afgelaai. Die middag het sy ’n oproep gekry waarin sy na die crèche ontbied is.
Sy en haar man vermoed hul babaseuntjie was toe reeds dood.
Die egpaar sê hulle het verneem volgens die nadoodse ondersoek blyk dit die kind het versmoor.
Die onstelde ouers meen die crèche se personeel was nalatig.
Volgens lt.kol. Annelie Wrensch, polisiewoordvoerder, is die lykskouingsverslag onafgehandel en kan die oorsaak van die kind se dood nie bevestig word nie.
Mnr. Geldenhuys sê hulle word nou leuens deur van die crèche se pesoneel gevoer.
“Hulle sê hy was van die oggend af siek.”
’n Ander werker hier het volgens die egpaar vir hulle gesê toe sy omstreeks 13:00 van diens gegaan het, het hul babatjie niks makeer nie.
Dié werker wou nie gister kommentaar aan Volksblad lewer nie.
Volgens die egpaar was hul kind sterk en gesond.
“Van geboorte af was hy nooit siek nie,” sê mnr. Geldenhuys.
Sy vrou sê die babaseuntjie het altyd geglimlag.
Volgens haar man was Gabriel ’n lewendige kind.
“Ek sal hom regtig mis,” sê mnr. Geldenhuys deur die trane.
Volgens hom oorweeg hulle regstappe.
Hulle wag net vir die volledige uitslae van die die nadoodse ondersoek.
“Dit (sy kind se dood) is onaanvaarbaar.”
Volksblad het Maandag navraag by Jabu Mbalula, woordvoerder van die Vrystaatse gesondheidsdepartement, oor Gabriel se dood gedoen.
Hy het bevestig hy het die e-pos ontvang en dit na die relevante mense in die hospitaal gestuur, maar teen druktyd is nog geen antwoord ontvang nie.
Die babaseuntjie word Woensdag om 14:00 uit die NG kerk op Verkeerdevlei begrawe.
- Volksblad