Baba steeds vermis
2010-04-26 11:42
Kobus Pretorius, Die Burger
Kaapstad - “Geen ma kan dit hanteer nie. Dit voel soos ’n droom.”
Dit is hoe die suster van die vrou wie se babadogter Vrydag ontvoer is, die situasie waarin haar suster haar bevind, beskryf.
Die baba, wat nog nie ’n naam het nie, is Donderdag omstreeks 06:45 gebore. Die kind se ma, Zukiswa Sikuni (31), is omstreeks 12:00 uit die Mitchells Plain-daghospitaal ontslaan.
Sikuni, wat nog aan skok ly, het Sondag by haar huis in Samora Machel met behulp van haar ouer suster, Letta Sikuni, aan Die Burger vertel wat gebeur het.
“Ek het Vrydagoggend teruggegaan hospitaal toe vir ’n opvolgbesoek. Ek het langs ’n vrou gaan sit wat met die ander mense in die wagkamer gesels het.
“Sy het na my toe gedraai en gevra of sy my kan help om die baba reg in haar kombers toe te draai.”
Ná die besoek het Sikuni uitgekom en gesien die vrou is steeds daar.
“Sy het gevra of sy my kan help deur die baba te dra.”
Terwyl hulle na die Mitchells Plain-taxistaanplek geloop het, het die vrou R10 uitgehaal en vir Sikuni gevra om vir haar ’n koeldrank langs die pad by een van die stalletjies te koop.
“Toe ek terugkom by die plek waar hulle gestaan het, was sy en my baba weg.”
Sikuni het ’n polisiereservis in die omgewing om hulp gevra, maar volgens haar wou hy haar nie help nie.
Volgens Letta is haar suster toe na die polisiekantoor waar sy die saak aangemeld het.
“My suster ly nog aan vertraagde skok. Die hele situasie voel nie werklik nie,” het sy gesê.
Kapt. Rewayne Muller, polisiewoordvoerder in Mitchells Plain, het gesê ’n saak van ontvoering word ondersoek.
Volgens die polisie se inligting is die verdagte ’n bruin 20-jarige vrou, sowat 1,5?m lank, skraal gebou en het sy ’n goue tand.
Sy praat glo Xhosa en Afrikaans vlot.
Enigiemand met inligting oor waar die ontvoerde baba en die verdagte hulle bevind, kan die ondersoekbeampte, ao. Josh Samuels, by 083 548 4677 bel.