Baba se valdood by hospitaal ondersoek

2013-01-21 16:30

Johannesburg – Die Gautengse departement van gesondheid ondersoek die dood van 'n baba wat by geboorte by die Kalafong-hospitaal in Alberton geval het, het 'n woordvoerder Maandag gesê.

Simon Zwane, woordvoerder, het gesê die kwessie word met "uiterste dringendheid" hanteer.

"Ons is nie gelukkig daaroor nie, en dit lyk asof nie ons pasiënt reg bestuur het nie, en die ongelukkige voorval veroorsaak het."

Janine Meiring (33) van Pretoria-Tuine is op 24 Desember na die hospitaal gehaas. Sy was 27 weke swanger toe sy kraampyne gekry het, het Beeld berig.

'n Verpleegster by die hospitaal het glo aan haar gesê daar is 'n personeeltekort en geen portier of rolstoel is verskaf nie.

Nadat sy 'n sonar gehad het, het die dokter haar glo geïgnoreer toe sy hom oor die baba gevra het en aan haar gesê het om terug te stap na die verpleegsters.

“Ek het gesê ek kan nie en gehuil. Die drukpyne was buite beheer. Hy het my aan my arm van die bed af gehelp.

“Ek het skaars twee tree gegee toe ek met my hand die baba se kop voel. Ek het vir die dokter gesê, maar hy het gesê ek moenie daar vat nie en my hand weggetrek,” het sy aan die koerant gesê.

“Toe kom my baba uit en gly deur my vingers op die vloer.”

Volgens Meiring was die impak so groot dat hy gewip het en die vloer ’n tweede keer getref het. Die baba se naelstring is losgeruk.

“Ek het in ongeloof na die dokter gekyk. Hy het sy kop geskud en glimlaggend gesê ek moet my baba optel. Hy het niks gedoen om te help nie.”

Volgens Meiring het sy met die baba, wat gesukkel het om asem te kry, in haar arms na die verpleegsters gehardloop. Die baba is enkele ure in die waakeenheid dood.

'n Pediater het glo gesê die kopbesering, die bloedverlies weens die gebreekte naelstring, infeksie of onderontwikkelde longe weens die vroeggeboorte kon sy dood veroorsaak het.

Meiring het gesê sy soek nie vergoeding nie en wil hê die dokter moet van sy praktyklisensie gestroop word.

"Hy moenie met vroue of kinders werk nie."

Zwane kon nie sê of die dokter nog aan diens is nie.

"Sodra al die ondersoeke afgehandel is, sal die kwessie by die gesondheidsraad aangemeld word."
      
– Volg Nuus24 op Twitter

- SAPA