Baba se hart in borskas teruggesit
2010-01-18 06:43
Johannsesburg - Chirurge was gister hoogs tevrede met hul eerste operasie op ’n baba wat met ’n gedeelte van haar hart buite haar borskas gebore is.
Tydens dié sowat drie uur lange operasie gisteroggend in die Chris Hani-Baragwanath-hospitaal in Soweto is Ashleigh-Karin Louw se misvormde maagwand en diafragma herstel.
Haar hart is ook sover moontlik in haar borskas teruggedruk en haar misvormde borsbeen gedeeltelik herstel.
Dr. Jerome Loveland, hoof van pediatriese chirurgie by Baragwanath, het op ’n mediakonferensie ná die operasie gesê dit het “pragtig” verloop, maar Ashleigh-Karin is nog nie buite gevaar nie. “Daar is nog die risiko van onder meer longontsteking en infeksie.”
Die volgende 24 uur is kritiek, sê dr. Pungie Linghem, kliniese hoof by Baragwanath.
Ashleigh-Karin is 10 dae gelede met pentalogie van Cantrell gebore. Dit is ’n uiters seldsame ontwikkelingsafwyking wat abnormaliteite in die borsbeen, maagwand, diafragma en hart veroorsaak. Die ingewande kan ook, soos in haar geval, deur die maagwand stoot.
As alles goed gaan, sal sy oor sowat twee tot vier weke huis toe kan gaan. “Sy sal dan moet groei en sterk word vir haar eerste hartoperasie wanneer sy omtrent vier maande oud is. ’n Reeks operasies sal nodig wees om haar hartabnormaliteite te herstel,” sê Loveland.
Die doel met gister se operasie was onder meer om Ashleigh-Karin se hart sover moontlik in haar borskas terug te druk, sodat dit meer beskerm is teen trauma, infeksie en blootstelling. Die gedeelte van haar hart wat uitgesteek het, was net met vel bedek.
Haar ingewande wat deur haar maagwand gedruk het – omdat laasgenoemde nie behoorlik tydens die voorgeboortelike ontwikkelingsproses gesluit het nie – is teruggedruk. Haar maagwand is ook herstel.
’n Hele span pediatriese spesialiste, onder wie narkotiseurs, kardioloë en chirurge, asook teatersusters, het Loveland tydens die operasie bygestaan.
Johanna More, bestuurshoof van die hospitaal, het die span gister vir hul dapperheid en goeie werk bedank. “Dit wys ons het die vermoë en vaardighede hier vir moeilike gevalle.”
Ashleigh-Karin se ouers, Donovan en Anastacia Louw, is van Eldoradopark, suid van Johannesburg, en het drie ouer kinders. Mnr. Louw is ’n pakker by Woolworths en mev. Louw ’n tuisteskepper.
- Die Burger