Baba op motor se sitplek gebore
2010-01-28 19:59
Pretoria – ‘n Babameisie is Donderdag op die voorste sitplek van ‘n verkeersbeampte se voertuig gebore, terwyl haar ma na die Tygerberg-hospitaal gehaas was.
Merle Lourens, woordvoerder van die Kaapstadse verkeersafdeling, het gesê Denver Peregrino het gesien hoe ‘n wit VW Golf oor die kruising van Stellenbosch Arterial-pad jaag.
“Hy het die motor agternagesit en ‘n 22-jarige passasier in uiterste pyn aangetref. Sy was ses maande swanger. Hulle het aan die beampte gesê hulle is op pad na die hospitaal, omdat hulle al langer as ‘n uur vir ‘n ambulans gewag het.”
Volgens Lourens het die beampte toe aangebied om hulle in sy voertuig na die hospitaal te neem.
“Toe hulle by die hekke van die hospitaal inry, is die baba op die voorste sitplek gebore,” het Lourens gesê.
Ma en baba is tans in die sorg van personeellede by die trauma-eenheid van die hospitaal.
- Sapa