Baba-ontvoering: Verdagte kry borgtog

2013-02-01 15:33

Johannesburg – ‘n Vrou wat daarvan aangekla word dat sy ‘n baba ontvoer en sy kinderoppasser probeer vermoor het, is borgtog toegestaan.

Khadija Khan – wat sewe maande swanger is met haar vierde kind – is op borgtog van R3 000 vrygelaat.

“Die hof beskou dit as wetlik korrek om jou borgtog toe te staan. Jy word opdrag gegee om by die adres op rekord aan te bly en nie dieselfde oortreding te pleeg terwyl jy op borgtog is nie,” het landdros PJ du Plessis gesê.

Haar kêrel en medebeskuldigde, Khalid Ayub, is borgtog geweier.

Die paartjie het op 8 Januarie na bewering die ses maande oue Revelation Jones uit sy ouerhuis in Bezuidenhout Valley ontvoer en probeer om sy oppasser keelaf te sny. Hulle het 'n kamer in die gesin se huis gehuur.

Die seun se pa het 'n SMS-boodskap ontvang, waarin die paartjie R100 000 geëis het in ruil vir die baba se veilige terugkeer.

Khan en Ayub is op 10 Januarie ná 'n wenk van die publiek in Fordsburg in hegtenis geneem. Die baba was ongedeerd toe hy gevind is.

Volg Nuus24 op Twitter

- SAPA