Pretoria - Munisipale werkers het Sondagoggend op ’n pasgebore babameisietjie,
toegedraai in ’n plastieksak, in ’n stuk veld naby ’n begraafplaas in Centurion
afgekom.
Frikkie Gous, woordvoerder van LifeMed-ambulansdienste, het
gesê die baba is met die naelstring en plasenta
gevind. Sy het in die son gelê en was skaars lewend toe die paramedici op die
toneel verskyn het.
“Sy was ook yskoud en erg ontwater,” het Gous gesê.
Volgens hom is die baba op die toneel
gestabiliseer en na die Steve Biko-hospitaal geneem vir verdere
behandeling.
“By die hospitaal is die baba
ondersoek en in ’n broeikas gesit om warm te word.
“Later is sy ook ’n bottel met formulemelk gegee.”
Volgens Gous het personeel by die hospitaal die baba Hope gedoop.
“As sy nog ’n uur later in die veld in die warm son moes lê, sou sy
dood gewees het. Sy is die pragtigste dingetjie. Nou kry sy behandeling en baie
liefde van die personeel.”
Hy het gesê die personeel by LifeMed het reeds baie oproepe ontvang
van mense wat graag klere en doeke aan Hope wil skenk.
Die polisie ondersoek die voorval en sal ook na ’n plek van
veiligheid soek waar Hope kan woon.
vkeppler@beeld.com