Baba gered toe ma aan H1N1 sterf
2009-08-24 06:29
Antoinette Pienaar
Johannesburg – ’n Baba moes sowat tien weke te vroeg in KwaZulu-Natal met ’n keisersnee in die lewe gebring word om hom te red kort voordat sy ma aan varkgriep dood is.
Jessica Dunne (née Olivier, 23) van Winterton is die naweek, skaars twee dae ná baba Joshua se geboorte, aan pandemiese (H1N1) 2009-virus dood.
Louis Joubert, hospitaalbestuurder, het aan The Witness bevestig dat die keisersnee Donderdag uitgevoer is en dat die baba steeds in die hospitaal is, maar wou niks verder sê nie.
Dunne, wat volgens The Witness vir die Drakensberg-seunskoor gewerk het, was 29 weke swanger.
Dokters by die Netcare St. Anne’s-hospitaal in Pietermaritzburg het die afgelope drie weke glo vergeefs probeer om Dunne te red nadat sy vroeër vandeesmaand siek geword het.
Joshua lê steeds in die hospitaal se neonatale waaksaal.
Sy ma is minstens die vierde swanger vrou wat die laaste paar weke in Suid-Afrika aan varkgriep beswyk het.
Die ander was ’n 27-jarige en ’n 38-jarige van die Oos-Kaap en ’n 23-jarige van Durban.
Na wat verneem word, is daar nog ’n vrou wat ernstig siek is in ’n Pretoriase private hospitaal nadat sy haar baba verloor het.
Die Nasionale Instituut vir Oordraagbare Siektes werk hul varkgriepstatistieke later vandag by en kon nie teen druktyd die sterfte bevestig nie.
Dunne is glo deur ’n private patoloog getoets.
Teen gistermiddag was daar reeds 442 mense wat aangesluit het by die Jessica Dunne-gedenk-en-bidgroep op Facebook, asook etlike boodskappe deur vriende en familie wat Dunne onthou vir haar vrolike geaardheid en “aansteeklike lag”. Uit haar Facebook-profiel, waar sy pryk op ’n foto saam met haar man, Shaun, is meer as 460 vriende gelys.
Die Wêreldgesondheidsorganisasie (WGO) het onlangs gewaarsku dat swanger vroue wat met varkgriep besmet word so vroeg moontlik antivirale medisyne kry.
Dit is ongeag die erns van haar simptome. Dit help ook nie om eers te wag totdat laboratoriumtoetse varkgriep bevestig nie.
Middels soos Tamiflu werk die beste wanneer dit binne 48 uur ná die eerste griepsimptome toegedien word en selfs voorkeurtoetse in Suid-Afrika duur minstens ’n dag.
The Lancet het onlangs berig oor ’n studie wat bevind het swanger vroue word vier keer meer weens varkgriep gehospitaliseer.
Die VSA se sentrums vir siektebeheer (CDC) het na 34 swanger vroue gekyk wat tussen 18 Maart en 15 April met varkgriep besmet is.
Sowat ’n derde is hospitaal toe – meer as vier keer soveel as lede van die algemene bevolking.
Ses van die 45 varkgriepsterftes wat tussen 15 April en 16 Junie in die VSA aangemeld is, was swanger vroue. Een van dié sterftes was onder die 34 vroue wat die CDC ondersoek het.
Sommige kenners vermoed die feit dat vroue se immuunstelsels onderdruk word tydens swangerskap speel ’n rol.
- Beeld