Baba by hospitaal gesteel
2010-10-04 23:58
Kaapstad - 'n Ses weke oue baba is glo Maandag deur 'n vrou by 'n daghospitaal in Khayelitsha gesteel, het die Wes-Kaapse polisie gesê.
Die kind se ma wou die toilet by die hospitaal gebruik toe die vrou aanbied om die baba vas te hou omdat die toilette baie vuil was, het kapt. Anneke van der Vyver gesê.
"Die ma het ingestem, maar toe sy na vyf minute terugkeer was die vrou en haar baba skoonveld."
Die vrou is ongeveer 40 jaar oud en 1.89 m lank. Sy het 'n wit rok en swart skoene aangehad en haar hare is tot op haar skouers.
Die baba, Simamkele Qhama Baleni, het 'n groen frokkie aangehad en was in 'n wit kombers toegedraai met teddiebeertjies daarop.
Die ma van die baba het die hospitaal vir 'n mediese ondersoek besoek.
- Volg Nuus24 op Twitter.
- SAPA