Baba brand dood in plakkershut
2010-02-07 12:22
Johannesburg – ‘n Baba van 18 maande het doodgebrand en haar broer en suster is ernstig beseer toe hul plakkershut in Cullinan, oos van Pretoria, afgebrand het, het die Gauteng-polisie gesê.
Polisiewoordvoerder Johannes Jaftha het gesê die ongeluk het om 01:00 in Refilwe Uitbreiding 5 gebeur.
Volgens hom was die baba aan die slaap saam met haar suster (9) en broer (12) toe hul hut aan die brand geslaan het.
Volgens Jaftha het die kinders se 18-jarige broer hulle in die plakkershut toegesluit nadat hy vir hulle kos gemaak het.
“Die broer het in sy aparte hut op die erf gaan slaap, maar is wakker gemaak deur die bure se geskree toe hulle die vlamme sien.
“Hy het ingestorm en kon die twee kinders red, maar die baba is deur die vlamme vasgevang binne en het gesterf,” het Jaftha gesê.
“Die oorsaak van die brand is nog onbekend en vorm deel van die ondersoek.”
Volgens Jaftha het die brand die plakkershut heeltemal verwoes.
Die twee kinders is in ‘n kritieke toestand na die Mamelodi-daghospitaal geneem.
‘n Geregtelike doodsondersoek sal gedoen word en brandstigting word ondersoek.
- Sapa