Baba bo-op ma se lyk gevind
2011-06-17 07:50
Koppies – ’n Babameisietjie is bo-op haar ma se lyk gevind.
Die ma se besonderhede is onbekend en die kind, nou wees, word in die Boitumelo-hospitaal op Kroonstad gehou totdat ’n familielid opgespoor kan word om haar te kom haal.
Kapt. Stephen Thakeng, ’n Noord-Vrystaatse polisiewoordvoerder, sê die vrou met die baba op haar rug is gesien waar sy geruime tyd in die Koppies-distrik rondgedrentel het.
Thakeng het gesê Samson Khope van die Rooipoort-hoewe het die ma op 6 Junie omstreeks 08:20 langs sy huis gesien lê.
Die baba was bo-op die ma.
Thakeng sê by die polisie se aankoms by Khope se woning is gevind dat die ma dood is.
“Die meisietjie is na Boitumelo vir behandeling gebring en is nou daar,” sê Thakeng.
Die lyk is na die Sasolburgse staatslykshuis gebring. Die oorsaak van haar dood was Donderdag nog nie bekend nie. “Tot op hede het niemand nog vorendag gekom om die oorledene te identifiseer nie,” sê Thakeng.
Die ma was geklee in ’n blou T-hemp met wit strepe en ’n groen kombers.
Die baba dra ’n wit T-hemp en ’n geel/roomkleurige baadjie.
Enigiemand wat kan help om die vrou se naasbestaandes op te spoor, moet ao. M.E. Pitso van die Koppies-speurdiens in kantoorure by 056-777-2811 bel.
Volg Nuus24 op Twitter.
- Volksblad