Baba-Marzaan se toestand verbeter
2010-04-30 14:23
Johannesburg – Die eenjarige baba Marzaan Kruger se toestand is besig om te verbeter, het ‘n woordvoerder vir die Sandton Medi-Clinic Vrydag gesê.
Liezl Furlong het gesê dat Marzaan Vrydagoggend van die asemhalingsmasjien gehaal is.
“Dit is ‘n duidelike teken van verbetering,” het sy gesê.
“Dit beteken dat die masjien nie meer vir haar asemhaal nie.”
Baba Marzaan en haar versorger Francina Sekhu is verlede Donderdag wreed by die Kruger-huis in Robindale in Randburg aangerand.
Marzaan het ernstige kopwonde opgedoen en was tot Vrydag onder verdowing gehou.
Sekhu het ook kopbeserings opgedoen. Beeld het vandeesweek berig dat sy besig was om goed te herstel en dat sy stadig besig was om te onthou wat gebeur het.
- Sapa
Volg Nuus24 op Twitter