'Baasbrein' agter sluipmoord 'gou vas'
2011-11-19 07:07
Pretoria – Nóg twee mans het Vrydag in die hof verskyn in verband met die moord op Chanélle Henning (26). Die vermeende baasbrein agter die sluipmoord sal na verwagting die naweek in hegtenis geneem word.
André Gouws (47), ’n goeie vriend van Henning se vervreemde man, Nico Henning, het Vrydag in die Pretoriase landdroshof op aanklagte van sameswering tot moord, moord en die onwettige besit van ’n vuurwapen en ammunisie verskyn.
Hy word daarvan verdink dat hy die skakel is tussen die baasbrein wat Henning wou dood hê en Ambrose Monye, wat glo die sluipmoordenaars gereël het.
Gouws het saam met Willem Marthinus (Pike) Pieterse verskyn, wat glo die motorfiets tydens die sluipmoordaanval bestuur het.
Gouws se vriendin, Estelle Hepburn, het die hofsaak bygewoon en gesê Gouws en Henning ken mekaar al ’n hele paar jaar.
Gouws was ook in 2006 op die Henning-egpaar se troue.
Na verneem word is Gouws ’n skuldinvorderaar en doen soms ook private ondersoeke.
Dit is nie bekend of Gouws enige skuldinvorderings of private ondersoeke vir enige van sy medebeskuldigdes of vir die vermeende baasbrein agter die sluipmoord gedoen het nie.
Hepburn het tydens die hofverrigtinge in die openbare galery agter Gouws gesit. “Die hele saak is aaklig. Dit is nie lekker dat hy in aanhouding is nie,” het sy burn gesê.
Me. Henning se ouers, Ivan en Sharon Saincic, het gesê hulle kon sedert hul dogter se dood nog nie rou nie en dat dit nog net ’n nagmerrie was.
– Volg Nuus24 op Twitter
- Beeld