'Baantjies vir boeties' saai chaos in Jhb
2012-03-22 12:02
Johannesburg – Vyf van Johannesburg se grootste diensleweringsdepartemente word verbind met bewerings oor finansiële onreëlmatighede, enorme verliese en bewerings van bedrog en korrupsie, het iol Donderdag berig.
Dié onreëlmatighede, sê die DA nou, is 'n gevolg van die ANC se baantjies-vir-boeties-beleid, waarvolgens topposte na bewering vir vriende van die party uitgehou word.
In die afgelope jaar is die Johannesburg-metropolisie se hoof ondersoek vir – maar onskuldig bevind op – aanklagte van wangedrag, en die hoof van die stad se nooddienste, Audrey Gule, is geskors ná bewerings dat sy van die stad se geld in haar eie sak gesteek het.
Ander departemente wat deur onreëlmatighede geraak word sluit in die parke-afdeling, Johannesburg Water, die Johannesburgse padagentskap en Pikitup.
Die ANC in Johannesburg het egter teen die DA uitgevaar en gesê dié party kan nie die mense van Johannesburg verteenwoordig nie.
“Ons is bewus van 'n tendens waar die DA Afdeling 79-komiteevergaderings bywoon om stories te kry wat hulle dink nuuswaardig kan wees," het die ANC se streekswoordvoerder vir Johannesburg, Jolidee Matongo, volgens iol gesê.
“Die DA is deel van die Johannesburgse metroraad. Dit was by raadsvergaderings waar verslae goedgekeur is vir die strukture en die administrasiestelsels in die stad.
Die DA het egter teruggekap met voorbeelde van wanbestuur en onreëlmatighede.
"Johannesburg Water was eers 'n winsgewende en goed bestuurde eenheid, maar die finansiële verslag vir die tweede kwartaal van verlede jaar wys dat 'n beraamde begrotingsoorskot van R187 miljoen verander het in 'n verlies van R122 miljoen," het die DA se Ralf Bittkau volgens iol gesê.
"Behalwe vir die moontlikheid van bankrotskap, sal die deurlopende verval van die bestaande infrastruktuur uiteindelik lei tot die ineenstorting van die hele stelsel."
– Lees hier meer.
– Volg Nuus24 op Twitter.
