BSB: Onnies wag steeds
2010-01-08 15:58
Johannesburg - Onderwysers wat steeds wag vir hul beroepspesifieke vergoeding (BSB) sal vroeg aanstaande week betaal word, het die departement van basiese onderwys Vrydag gesê.
" 'n Reeks betalings vir uitstaande bedrae sal oor die naweek gemaak word," het 'n departementele woordvoerder, Granville Whittle, in 'n verklaring gesê.
Die geld behoort teen Dinsdag beskikbaar te wees, het Whittle gesê.
Die onderwysvakbond Sadtu het in November gesê onderwysers sal hul BSB voor Kersfees ontvang.
Die oorspronklike voorgestelde datum vir betaling was April 2010.
In Oktober vanjaar het die onderwysdepartement aangebied om ‘n R2,3 miljard betaling van die BSB vir die erkenning van ondervinding in die vorm van ‘n eenmalige kontant bonus vir senior onderwysers te maak.
Dié betaling was nie gemaak nie vanweë druk op die Persal-salarisstelsel om die jaarlikse salarisverhogings in werking te bring.
Die departement het gesê dit sal die betaling aan die einde van November maak maar kon nie ‘n spesifieke datum vasstel nie. Sadtu het briewe aan die departement gestuur wat aandring op ‘n datum vir die betaling.
“Die departement het aangekondig dat dit die volle bedrag, soos ooreengestem, in die huidige finansiële jaar sal maak,” het Sadtu gesê.
Die betalings moes op 18 Desember gemaak wees.
- Sapa