BRT-busse ry weer
2010-05-11 09:34
Johannesburg - Rea Vaya-snelbusdiens (BRT) se bestuurders sal Dinsdag terugkeer werk toe nadat hulle vakbond die dispuut met die stad Johannesburg opgelos het, het die busmaatskappy gesê.
"Die vakbond-dispuut by die Rea Vaya-busmaatskappy is suksesvol opgelos," het die Rea Vaya-woordvoerder, Jackie Huntly in ‘n verklaring gesê.
"Rea Vaya se dienste sal vanaf Dinsdag weer soos normaal verloop en kaartjies sal by alle busstasies te koop wees.”
Die bestuurders wou gehad het die stad moes hul vakbond, die Suid-Afrikaanse Munisipale Werkersunie (Samwu) die erkenning gee wat hulle verlang.
Sy het gesê hulle het met Samwu ooreengekom dat die vakbond kan aansoek doen vir 'n interdik by die Arbeidshof.
Indien die interdik toegestaan word, sal die vakbond toegelaat word om by die onderhandelingsraad verteenwoordig te word.
Huntly het gesê hulle was onder die indruk dat indien Samwu erkenning gegee word, dit probleme by die onderhandelingsraad sou veroorsaak omdat die vakbond onder die plaaslike regeringsektor val en die busmaatskappy in ‘n ander sektor.
Tahir Sema, Samwu se woordvoerder, het Maandag gesê die werkers wil ook deel wees van die plaaslike regering.
"Deur die interdik toe te staan, sal die snelbusdiens baie gehelp word,” het hy gesê.
-Sapa
Volg Nuus24 op Twitter.