Aspirant-polisiebeampte sterf tydens fiksheidstoets
2012-01-31 22:09
Johannesburg – ‘n Ses-en-twintig-jarige man het Dinsdag inmekaargesak en gesterf terwyl hy ‘n fiksheidstoets by die Tshwane-metropolisie se akademie afgelê het, het ‘n polisiewoordvoerder gesê.
Die man was deel van ‘n groep wat 2,4 kilometer moes draf vir ‘n fiksheidstoets, wat deel uitmaak van die fisieke evaluering vir alle voornemende polisiebeamptes.
Console Tleane, woordvoerder van die Tshwane-metropolisie, het gesê die man het omstreeks 14:15 buite die hekke van die akademie inmekaargesak.
“Hy is by die akademie ingeneem en lewensreddingsmetodes is op hom toegepas terwyl ‘n ambulans op pad was. Die personeel het besluit om hom eerder na die Pretoria Wes-hospitaal, wat slegs ‘n paar minute se ry weg is, te neem,” het Tleane gesê.
Hy het in die hospitaal gesterf.
Die Tshwane-metropolisie assesseer 60 000 aansoeke vir 500 plekke as metropolisie-studente.
Die assessering sluit die fisieke evaluering in.
- Volg Nuus24 op Twitter
- SAPA