Arm studente kry geld om te studeer
2013-01-24 15:26
Johannesburg – Alle arm studente wat by tersiêre instellings aanvaar word, sal befondsing kry, het Blade Nzimande, minister van hoër onderwys, Donderdag belowe.
"Hoewel ons nie genoeg fondse het nie, sal studente met arm agtergronde, wat by kolleges of universiteite aanvaar is, befondsing kry. Almal van hulle. Dit is gewaarborg," het die minister op 'n geleentheid van The New Age in Johannesburg gesê.
Nzimande het gesê die regering het vanjaar R8 miljard opsy gesit vir borgskappe.
Die meeste van die geld is in 'n nasionale hulpskema geplaas vir studente by kolleges vir voortgesette onderwys en opleiding (FET-kolleges).
Die doel van die regering is om studente aan te moedig om eerder by dié kolleges as gewone universiteite te studeer.
"Ons benodig baie kritieke vaardighede wat jy nie by universiteite kan kry nie, jy kan dit slegs by FET-kolleges kry," het Nzimande gesê.
"Jy kan nie na 'n universiteit gaan om 'n loodgieter, elektrisiën of ketelmaker te word nie."
Nzimande het gesê sommige veranderings moet gemaak word sodat studente FET-kolleges kan begin kies. Dosente benodig meer opleiding en die standaard van opvoeding moet verbeter word.
Hy het universiteite aangemoedig om krediete aan studente te gee wat met kwalifikasies van FET-kolleges afkom en het benadruk dat maatskappye moet oorweeg om meer kollege-studente vir leerderskappe, vakmanskappe en internskappe te aanvaar.
Nzimande het gesê sy departement het die uitdaging om geleenthede vir alle Suid-Afrikaners te skep en nie net vir diegene wat gr. 12 voltooi het nie.
"Elke Suid-Afrikaner, of jy nou gedruip of geslaag het; ons moet 'n geleentheid vir jou skep om 'n vaardigheid te bekom, al het jy 20% gekry."
– Volg Nuus24 op Twitter
- SAPA
