Apteker raaiselagtig voor sy huis vermoor
2010-07-24 10:50
Kaapstad - ’n Geliefde apteker van Vredenburg is in raaiselagtige omstandighede voor sy huis vermoor.
George Diederik (Angel) Engelbrecht (63), mede-eienaar van die Weskem Alpha Pharm, is Donderdagaand voor sy huis geskiet.
Hy het omstreeks middernag van ’n eetklub af teruggekom en was besig om die potte en panne waarmee hy gekook het
uit sy voertuig na sy huis te dra.
Sy seun, George Engelbrecht jr. (24), het hom gehelp om die motor af te laai en was in die huis in Van Linschotenstraat toe sy pa vermoor is. “My pa het uit die huis geloop toe ek sien hoe twee koeëls hom tref.
“Hy het na die gang gestrompel en inmekaargesak. Ek het gehoor hoe die aanvallers by die huis inkom en ek het ’n middeldeur na die res van die huis toegemaak.
“Ek weet nie wat verder gebeur het nie,” het Engelbrecht gesê. “My pa gaan ’n groot leemte laat.”
’n Ambulans is ontbied, maar Engelbrecht het op die toneel gesterf. Albei koeëls het hom in die linkerbors getref.
’n Koeëldoppie is in die huis gekry. Gister is nog twee buite die huis opgespoor. Sover bekend is niks uit die huis gesteel nie.
Volgens sy vennoot, mnr. Ben van Heerden, was Engelbrecht baie lief vir mense. Hy het ook die Argus-fietstoer tien keer voltooi.
“Engelbrecht was ’n bekende karakter in die dorp en baie toegewyd aan sy beroep. Hy het veral van die buitelewe gehou en was ’n groot Blou Bul-ondersteuner.”
Volgens Van Heerden het hy baie uitgesien na sy aftrede en veral om bietjie rustiger te raak. Hy het die aand van sy dood stampmielies en ertjiesop vir die gaste by die Dikvreet-etensklub gekook.
’n Emosionele Wendy Augustyn, ’n administratiewe klerk by die apteek, het gesê hy was ’n wonderlike baas. “Almal by die werk is baie geskok. Dit gaan ’n groot impak op ons almal hê.”
Die Weskem Alpha Pharm bestaan al 30 jaar en Engelbrectht was 18 jaar lank ’n mede-eienaar.
Hy word ook oorleef deur sy vrou, Erna, ’n onderwyser by die Laerskool Vredenburg, en nog ’n seun, Phillip (30).
Volgens kapt. Thembela Mgudlwa, woordvoerder van die Verdenburg-polisiekantoor, word ’n saak van moord ondersoek.
“Daar is tans geen verdagtes nie, maar ons is besig om verskeie leidrade op te volg.”
Enigeen met inligting kan ao. Stoney Steenkamp by 073 160 8666 of 022 703 6440 bel.
Volg Nuus24 op Twitter
- Die Burger