Appèl van geskorste gay predikant sloer
2010-02-17 08:54
Neels Jackson
Pretoria - ’n Gay predikant van die Metodistekerk is uit haar kerk geskors omdat sy met haar lewensmaat getrou het.
Eerw. Ecclesia de Lange, wat die Brackenfell- en Windsor Park-gemeentes in Kaapstad bedien, wag nou langer as ’n week om te hoor oor haar appèl teen die skorsing.
Sy het in ’n stuk wat op haar ondersteunersgroep se bladsy op Facebook geplaas is, geskryf: “Ek het by die punt gekom waar ek nie langer stil kan wees nie. Ek het tot die insig gekom dat dit beter is om veroordeel te word vir wie ek is as om aanvaar te word vir wie ek nie is nie.”
De Lange het in die stuk vertel hoe sy haar seksuele oriëntasie probeer ontken het. Tydens haar opleiding in die Metodistekerk het sy egter ontdek sy kan die Bybel lees op ’n manier wat met haar oriëntasie versoen kan word.
Sy het vrede gemaak met haarself en later iemand ontmoet met wie sy haar lewe wou deel. In Desember is hulle getroud en De Lange het haar stilswye oor haar seksuele oriëntasie verbreek.
Sy is in Januarie egter skuldig bevind daaraan dat sy die kerk se reëls met haar gay huwelik verbreek het, en is geskors.
De Lange het geappelleer teen die skorsing en dit is verlede week aangehoor. Teen Dinsdagmiddag was die bevinding egter nog nie bekend nie.
De Lange, wat belet is om met die media te praat, het op Facebook gesê sy hoop om God as ’n Metodis te dien en aanvaar te word vir wie sy is.
- Die Burger