Apartheid-dokter in oorsese seksskandaal

2012-10-02 11:35

Johannesburg – 'n Voorverhoor begin Woensdag in Kanada om oor die geestesbevoegdheid van die voormalige hoof van psigiatrie in 1 Militêre Hospitaal in Pretoria te beslis.

Dr. Aubrey Levin staan tereg op tien aanklagte van die seksuele aanranding van manspasiënte.

Beeld berig die voormalige Suid-Afrikaanse psigiater het tydens die apartheidsjare ‘n omstrede program by dié hospitaal bedryf.

Dié program is ontwerp om gay soldate met skokterapie tot heteroseksualiteit te “genees”.

Die aanklagte teen hom is almal deur voormalige pasiënte ingedien. Die meeste van dié pasiënte was gevangenes aan wie hy namens die Kanadese regering sielkundige berading gegee het.

Calgary Herald berig Levin se regspan het verlede week aangevoer hy is te siek om binne die volgende drie maande verhoor te word.

Regter Donna Shelley het dié aansoek van die hand gewys en gesê daar is geen aanduiding dat sy gesondheid binne drie maande sal verbeter nie.

Levin se regspan het aangevoer dat hy nie geestelik bevoeg is om verhoor te word nie omdat hy aan ’n geestesversteuring ly.

Die staat het aangedui dat mediese getuies opgeroep sal word om die teendeel te bewys. Sy verhoor sal volgende week begin indien hy geestelik geskik bevind word.

Volg Nuus24 op Twitter   

- SAPA