Anni se familie 'bly' oor uitleweringsbevel
2011-09-28 22:55
Johannesburg – Anni Dewani se familie is “bly” dat die Britse minister van binnelandse sake ‘n uitleweringsbevel onderteken het vir Shrien Dewani om in Suid-Afrika verhoor te word vir die moord op sy vrou, het die Verenigde Koninkryk se Persvereniging Woensdag berig.
“Ons het dit verwag, maar ons het nie verwag die besluit sou so vroeg kom nie,” het Anni se oom, Ashok Hindocha, gesê.
“Dit wys dat die stelsel uiteindelik werk en ons is bly hierdie kan nou tot ‘n punt van afsluiting kom.”
Die familie het verlede week ‘n petisie aan die departement van binnelandse sake oorhandig, waarin hulle by die minister gepleit het om seker te maak Dewani word uitgelewer.
Die familie het gesê die verhoor van Dewani is die enigste manier waarop hulle die antwoorde kan kry wat hulle nodig het.
Die Nasionale Vervolgingsgesag (NVG) in Suid-Afrika het vroeër gesê Dewani sal 14 dae hê om appèl aan te teken, indien hy sou wou.
‘n Londense regter het op 10 Augustus beslis Dewani kan aan Suid-Afrika uitgelewer word.
Hy word daarvan beskuldig dat hy die moord op sy vrou gekoördineer het terwyl hulle met hul wittebrood verlede November in Kaapstad was. Hy beweer hulle is gekaap.
Met sy terugkeer na die VK is hy in ‘n fasiliteit opgeneem om vir post-traumatiese stres behandel te word. Sy verdediging het ook gesê hy is te siek om te reis.
Xolile Wellington Mngeni, Mziwamadoda Lennox Qwabe, die taxibestuurder Zola Robert Tongo en Monde Mbolombo is almal tydens die ondersoek in hegtenis geneem.
Tongo dien reeds gevangenisstraf uit ná hy ‘n pleitooreenkoms aangegaan, getuig het en gevonnis is.
Mbolombo het staatsgetuie geword en sal getuig in die verhoor van Mngeni en Qwabe.
- Volg Nuus24 op Twitter
- SAPA