Anika-moord: Talle betoog teen borgtog
2010-05-19 06:11
Hilda Fourie, Die Burger
Pretoria - Tientalle mense, geklee in rooi, sal na verwagting Woensdag na die landdroshof in Pretoria-Noord opruk waar ’n verdagte in verband met Anika Smit se dood sal verskyn.
Nico Venter (21), glo Anika (17) se gewese kêrel, sal in dié hof teregstaan op ’n aanklag van moord nadat hy Maandag in sy woonstel by die Carousel-casino, noord van Pretoria, in hegtenis geneem is.
Anika is meer as twee maande gelede in haar ouerhuis in Theresapark in die noorde van Pretoria vermoor. Haar hande is ook afgesny.
“Die gemeenskap vra dat hy (Venter) nie op borgtog vrygelaat word nie en dit is hoekom ons dié aksie reël,” het rdl. Dana Wannenburg van die Tshwane-metroraad gister gesê.
Volgens Wannenburg sal dit in die verdagte se eie belang wees omdat sy lewe weens die woede onder die gemeenskap moontlik in gevaar kan wees.
Dié optrede sal met Solidariteit se nasionale dag van protes teen misdaad saamval.
Volgens Wannenburg wys Venter se hofverskyning presies waaroor dié dag gaan – om die klem te plaas op misdaad wat Suid-Afrikaners bekommerd het.
“Ons wil hê mense moet bewus wees van hoe erg die misdaad is sodat dit wat met Anika gebeur het nie met jou ma of pa of enigiemand na aan jou gebeur nie.”
Die mense sal in die parkeerterrein oorkant die hof bymekaar kom. ’n Verteenwoordiger van die Pretoria-Noord-polisiekantoor sal dan daar ’n memorandum van die gemeenskap ontvang.
’n Soortgelyke memorandum sal ook aan verskeie polisiekantore in 312 dorpe in Suid-Afrika oorhandig word.
Die grootste aksie van dié dag sal by die Harlequins-klub in Totiusstraat in Groenkloof, Pretoria, plaasvind. Mense sal ook die geleentheid kry om kranse te lê vir slagoffers van misdaad.
- Die Burger