Anene: Beskuldigde het merke aan sy lyf gehad
2013-02-26 15:27
Bredasdorp – Anene Booysen se vermeende moordenaar en verkragter het geval en homself beseer, het die Bredasdorp-landdroshof Dinsdag gehoor.
Maria Marshall, staatsaanklaer, het gesê die 22-jarige Jonathan Davids het merke op sy linkerarm en nek gehad toe hy op 2 Februarie in hegtenis geneem is.
Davids, wat in sy borgtogaansoek getuig het, het gesê hy het die beserings opgedoen toe hy daardie oggend geval het.
Booysen is vroeg daardie oggend verkrag en vermink en vir dood gelaat. Voor sy in die hospitaal gesterf het, het sy aan hospitaalpersoon gesê "Zwai" en ses ander mans is verantwoordelik vir haar beserings.
Davids se bynaam is Zwai.
Hy het vroeër aan die hof gesê hy ken nóg 'n Zwai wat in Zwelitsha woon.
"Ek het gehoor hy is 'n lid van die 28's bende," het Davids gesê.
Hy kon egter nie sê of Booysen die man geken het nie.
Davids en sy medebeskuldigde, Johannes Kana, word van die moord en verkragting op Booysen beskuldig. Dit is 'n bylae 6-misdryf en die beskuldigdes moet "buitengewone omstandighede" bewys wat hul borgtog regverdig.
Kana se borgtogaansoek sal in 'n latere stadium aangehoor word.
Marshall het gewaarsku dat die polisie nie Davids se veiligheid kan waarborg indien hy op borgtog vrygelaat word nie.
Die gemeenskap het dit in 'n petisie duidelik gestel dat hulle nie wil hê enige misdadigers moet in die gebied woon nie.
"Indien borgtog toegestaan word, is jy nie bekommerd oor jou veiligheid nie? Hulle kan jou seermaak," het Marshall gesê.
Davids het sy kop geskud en gesê: "Hulle mag nie".
Hy het later egter toegegee dat sy lewe in gevaar kan wees.
Marshall het gevra hoekom borgtog toegestaan moet word.
"Omdat ek onskuldig is," het Davids geantwoord.
– Volg Nuus24 op Twitter
- SAPA
