Amptenare vroetel lustig in staatskas
2010-09-12 10:20
Johannesburg - Die staatsdiens kan lamgelê word as al die amptenare afgedank word wat betrokke is by bedrog met welsyntoelae.
Dit
kom neer op sowat 8% van alle staatsdiensamptenare. Gevolglik het die
staatsdienskommissie aanbeveel dat dié amptenare net finale skriftelike
waarskuwings kry.
Meer as 15 000 amptenare is reeds hieroor aan bedrog skuldig bevind en nóg duisende gaan vervolg word.
Die
hoof van die spesiale ondersoekeenheid (SOE), adv. Willie Hofmeyr, het
aan Rapport bevestig dat sy eenheid 96?000 amptenare geïdentifiseer het
wat by bedrog betrokke is.
Dié ondersoek is nog net op nasionale
en provinsiale vlak gedoen. Plaaslike regerings en staatsagentskappe
moet nog bekyk word.
Die SOE ondersoek korrupsie en wanbestuur in die staatsdiens en stel siviele gedinge in om verliese te herwin.
“Hierdie
soort bedrog is baie ernstig en kom oral voor,” sê Hofmeyr. “Toe ek
hierdie ondersoek begin het, het ek nooit gedink die syfer gaan só hoog
wees nie.”
Die veroordeelde amptenare het pleitooreenkomste met
die nasionale vervolgingsgesag aangegaan en skuldig gepleit op aanklagte
van bedrog. Hulle moet die gesteelde geld met rente aan die staat
terugbetaal.
Hofmeyr sê hy het sedert 2006 die uitslae van meer as 10 000 dissiplinêre sake aan verskeie staatsdepartemente oorhandig.
Hieronder was 945 lede van die Suid-Afrikaanse Polisiediens (SAPD).
Kol.
Vishnu Naidoo, polisiewoordvoerder, sê sowat 350 polisielede het finale
skriftelike waarskuwings ontvang, terwyl ander se “afdankings met ses
maande opgeskort is”.
Dr. Johan Burger, senior navorser by die
Instituut vir Sekerheidstudies (ISS), sê dit is “ontstellend” dat
polisiebeamptes wat bedrog gepleeg het, toegelaat word om in die mag te
bly.
Lt.genl. Bonang Mgwenya, uitvoerende hoof in die kantoor van
die nasionale polisiekommissaris, sê die dissiplinêre verhore is in
kategorieë ingedeel en “in groepe” afgehandel.
“Sommige het
skriftelike waarskuwings gekry en sommige het opgeskorte afdankings
ontvang. Dié proses is voorafgegaan deur besluite en riglyne van die
staatsdienskommissie,” sê Mgwenya.
Die SAPD se lt.genl. Gary
Kruser sê die staatsdienskommissie het op finale skriftelike
waarskuwings besluit “omdat daar so baie mense betrokke is en hulle
soveel mense sal moet afdank”.
Die meeste van die veroordeelde amptenare werk in die departemente van gesondheid en onderwys oor die land heen.
Hulle het onder meer kinderonderhoudstoelae, pleegsorgtoelae en ouderdomspensioene ontvang waarop hulle nie geregtig was nie.
Hofmeyr sê die SOE ondersoek tans verskeie gevalle van bedrog rondom ongeskiktheidstoelae.
Hy
sê ondersoeke na hierdie soort bedrog is baie moeiliker en tydrowend
omdat nie net amptenare nie, maar ook misdaadsindikate en korrupte
dokters betrokke is.
Die SOE ondersoek ook massiewe bedrog met
behuising waarby miljarde rand betrokke is. Hofmeyr en sy ondersoekers
het 20 verdagte behuisingskontrakte geïdentifiseer.
Minstens 7
000 amptenare is ondersoek omdat hulle glo onwettig behuisingsubsidies
ontvang het. Minstens 900 amptenare is vasgetrek en die meeste is aan
bedrog skuldig bevind.
Pres. Jacob Zuma het onlangs die SOE
opdrag gegee om ondersoek na bedrog en korrupsie in sewe nasionale en
provinsiale departemente in te stel.
Die SOE het 550
personeellede, waarvan 450 operasionele lede is. Hofmeyr wil nog 100
lede aanstel om te help om bedrogsake te ondersoek.
“Korrupsie is werklik baie, baie ernstig en as ons dit nie nou in die kiem smoor nie, gaan dit handuit ruk.”
- Rapport