Amor weier om bevel teen Joost te laat vaar
2010-08-18 06:44
Die Burger
Johannesburg - Amor Vittone weier om die beskermingsbevel wat sy teen Joost van der Westhuizen gekry het, terug te trek.
“Amor is nie ’n impulsiewe persoon nie. Sy sal nie sommer ’n interdik teen Joost kry vir geen rede nie. Sy het goeie rede daarvoor,” het Claudio Bollo, Amor se prokureur, Dinsdaggesê.
Hy wou nie kommentaar lewer oor wat moontlik tot die bevel gelei het nie.
Joost, wat volhou hy’s nog lief vir Amor en hul kinders, se prokureur, Robert Klinkenberg, het Dinsdag bevestig hulle gaan ’n hofaansoek bring om die bevel tersyde te stel.
“Ons behoort Donderdag of Vrydag die aansoek te bring.” Intussen sou hulle wag om te hoor of Amor dié aansoek gaan terugtrek, maar sy weier.
Ingevolge ’n klousule in die bevel mag die inhoud daarvan nie aan die pers geopenbaar word nie, het albei prokureurs bevestig.
Joost en Amor is in Mei uitmekaar. Hy het haar onlangs vir ’n egskeiding gedagvaar, na bewering oor ’n derde party.
“Net omdat hy die een is wat dagvaar, beteken nie sy gronde vir die egskeiding is die waarheid óf geldig nie,” het Bollo gesê. “Amor kon al drie maande gelede (toe die glansegpaar uitmekaar is) dagvaar vir ’n egskeiding.”
Hy het aangedui hy gaan Joost se aansoek teenstaan.
Volgens Bollo het Amor ’n besluit geneem om die besonderhede van die egskeiding so privaat moontlik te hou “om Joost en hul kinders te beskerm”.
Die beskermingsbevel belet Joost nie om sy kinders te sien nie. “Die interdik stop Joost glad nie om ’n pa vir sy kinders te wees nie. Dis iets waaroor Amor baie sterk voel. Hy mag hulle nog sien. Omdat hulle by haar woon en skoolgaan, is daar uit die aard van die saak sekere tydsbeperkinge,” het Bollo gesê.
Klinkenberg het ook bevestig Joost mag sy kinders sien, “maar dis baie beperk”.
Joost self het aangedring die egskeiding “is privaat”.
Volg Nuus24 op Twitter
- Die Burger