Amor gedreig
2010-08-13 10:01
Kaapstad - Die stormwolke rondom Joost van der Westhuizen en Amor Vittone se egskeiding bly net ál digter saampak met nuwe bewerings van ‘n dreigbrief wat Vittone ontvang het en vars inligting rondom 'n moontlike "derde party."
Volgens onlangse mediaberigte het Van der Westhuizen – ‘n selferkende ontroue eggenoot en hoofrolspeler in ’n seksvideo – Vittone glo van ontrouheid beskuldig.
Huisgenoot berig nou dat Van der Westhuizen toegang tot Vittone se rekenaar of selfoon gekry het en afgekom op korrespondensie tussen haar en ’n man wat sy onlangs tydens ’n vakansie in Kanada ontmoet het.
‘n Vertrouling van Vittone het hierdie inligting aan Huisgenoot bekend gemaak, maar is die inhoud van die korrespondensie egter glo “doodonskuldig.”
“Nee, jy kan dit nie ’n flirtasie noem nie. Dis ook nie ’n affair nie – hy sit dan daar en sy hier. Dis ’n vriend wat haar ’n bietjie boost, dis al,” het die vriendin aan Huisgenoot vertel.
“Maar Amor en die man het nogal vermoed dat Joost haar gaan dophou deur na haar korrespondensie te kyk, en hulle het doelbewus leidrade gelos om te sien of hulle hom kan betrap,’’ het die vriendin ook gesê.
Huisgenoot berig verder dat Vittone ’n naamlose dreigbrief ontvang het waarin sy gewaarsku is as sy nie vir Joost terugvat nie, sal sy in die openbaar verneder word.
Die skrywer van dié brief het ook glo na bewering gesê hy of sy was een van die betrokkenes by die maak van die seksvideo.
Lees meer by Huisgenoot.com